Трамп Туркияда самолётини нега алмаштирди?(+видео)
АҚШ президенти Дональд Трамп июль ойида Анқарада бўлиб ўтган НАТО саммитидан бошқа самолётда қайтди. У бунга эҳтимолий таҳдид сабаб бўлганини айтди, деб хабар қилди DW нашри.
АҚШ президенти Дональд Трамп 11 август, сешанба куни журналистлар билан суҳбатда НАТОнинг Анқарадаги саммитидан кейин Туркия аэропортида эҳтимолий таҳдид сабабли самолётини алмаштирганини тасдиқлади. Трампнинг айтишича, у АҚШ Махфий хизмати ва ҳарбийлар кўрсатмасига амал қилган.
The Washington Post маълумотига кўра, президентни ўзининг самолётидан яширинча чиқариб, бортга овқат етказиб бериш учун мўлжалланган махсус машина орқали бошқа самолётга олиб ўтишган. Бу операция Эрон томонидан бўлиши мумкин бўлган таҳдидлар сабабли амалга оширилган.
Трамп операциянинг айнан шу тарзда ўтказилганини очиқ тасдиқламаган. Президентга ҳамроҳлик қилган бошқа йўловчилар таҳдид ҳақида огоҳлантирилмаган. Самолёт бортида Оқ уй ходимлари ҳамда Дональд Трампнинг хорижий сафарларида унга ҳамроҳлик қилувчи журналистлар бўлган.
The Washington Post хабар беришича, уларга самолёт алмаштирилаётгани ёки эҳтимолий Эрон таҳдиди ҳақида маълум қилинмаган. Шунингдек, улардан самолёт иллюминаторларининг пардаларини ёпиқ ҳолда сақлаш сўралган.
Трамп Туркиядан кейин Буюк Британияга учиб борган. У ерда президент ва унинг делегацияси ҳамда журналистлар Қатар томонидан Трампга совға қилинган янги президентлик самолётига ўтиришган. АҚШга етиб келгач эса Трамп журналистлар камералари қаршисида ўзининг самолётидан тушган.
The Washington Post маълумотига кўра,бу орқали жамоатчиликда президент Туркиядан АҚШгача бўлган бутун йўлни ўзининг самолётида босиб ўтган, деган тасаввур пайдо қилиниши кўзланган.
<iframe width="650" height="420" src="https://www.youtube.com/embed/_GEhcT2ep2o" title="Tramp Turkiyada samolyotini nega almashtirdi?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев, ЎзА
