Трамп Орбанни БМТ Бош котиблигига таклиф қилди (+видео)
“The Wall Street Journal” маълумотига кўра, Дональд Трамп маъмурияти Венгриянинг собиқ бош вазири Виктор Орбанни БМТ Бош котиби лавозимига номзод сифатида кўрмоқда.
Нашр ёзишича, Вашингтон Орбанга сайловда иштирок этиш имкониятини кўриб чиқиш таклифини берган. Америка расмийлари АҚШ, Россия ва Хитой томонидан ягона номзодни илгари суриш учун Москва ва Пекиннинг қўллаб-қувватловидан умидвор.
Давлат департаменти вакили баҳолашича, ушбу номзодни Хавфсизлик Кенгашида 8-10 нафар аъзо маъқуллайди. Бинобарин, вето ҳуқуқига эга Буюк Британия ва Франция қарши чиқиши мумкин.
Газета Орбаннинг ўзи ҳам мазкур таклифга қизиқиш билдирганига эътибор қаратган. Фақат жиддий қўллаб-қувватловга ишонч ҳосил қилмасдан туриб, курашга киришмоқчи эмас.
Оқ уй Будапешт ҳукумати собиқ раҳбарини БМТ бошқарувида иш услубини ўзгартиришга қодир сиёсатчи сифатида кўряпти. Трамп ва вице-президент Жей Ди Вэнс аввал ҳам Орбанни очиқ қўллаб-қувватлаган. Жумладан, Венгриядаги парламент сайлови даврида ҳам унинг тарафини олган.
Ҳозирча Орбаннинг номзоди расман илгари сурилиши ҳақида эълон қилинмаган. Таъкидланишича, бу масала бўйича қарор АҚШ оралиқ сайлови туфайли кечиктирилиши мумкин.
БМТ Бош котиби Антониу Гутерришнинг ваколати муддати 2026 йил 31 декабрда тугайди.
Кенжа Бекжонов,
Салимжон Обиджонов (видео),
ЎзА
