Трамп Эроннинг урушни тўхтатиш режасига рози бўлмади
АҚШ президенти Дональд Трамп Эрон томонидан таклиф қилинган урушни тўхтатиш режасига эҳтиёткор ва шубҳали муносабат билдирган. Бу ҳақда Reuters ва The Wall Street Journal манбаларига таяниб DW нашри хабар берди.
Маълум бўлишича, Эрон томони урушни тўхтатиш ва Ҳурмуз бўғозини очиш масаласини кўтариб, ядровий дастур бўйича музокараларни кейинроқ муҳокама қилишни таклиф қилган.
Бироқ Трамп ва унинг миллий хавфсизлик бўйича маслаҳатчилари бу ёндашувга қўшилмаган. Айниқса, ядровий дастур бўйича музокараларни учинчи босқичда кўриб чиқиш Трамп ва унинг маслаҳатчиларига маъқул келмаган.
27 апрель куни Трамп ўз маслаҳатчилари билан вазиятни муҳокама қилган ва АҚШ томони ядровий дастур масаласи биринчи ўринда туриши керак, деган қарорга келган.
Оқ уй матбуот котиби Оливия Уэйлс АҚШ матбуот орқали музокара олиб бормаслигини, яъни бу масалаларда талаблар аниқ эканини таъкидлаган.
Мутахассисларнинг фикрича, музокаралардаги келишмовчиликлар дунё нефть бозорига ҳам таъсир қилмоқда. Ҳурмуз бўғози орқали нефть ташиш чеклангани сабабли дунёда нефть нархлари кўтарилмоқда.
Маълумотларга кўра, сўнгги кунларда бўғоздан нефть танкерлари ўтказилмаяпти. АҚШ ва Исроилнинг Эронга қарши уруши бошланмасидан олдин бўғоз орқали кунига 150 дан зиёд нефть ортган кемалар ўтиб турган.
Ҳозирги ҳолат урушнинг иқтисодий оқибатларини кучайтириб, халқаро бозорларда беқарорликни оширмоқда. Деярли икки ойдан бери давом этаётган уруш нефть нархларининг кескин ошишига, дунёдаги иқтисодий жараёнларни издан чиқаришига ва минглаб одамларнинг ўлимига сабаб бўлмоқда.
<iframe width="412" height="732" src="https://www.youtube.com/embed/gdNxdVehcT0" title="Tramp Eronning urushni to`xtatish rejasiga rozi bo`lmadi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Искандар Исматов, ЎзА
