Трамп: Эрон ҳали етарли бадал тўламади
Президент Дональд Трамп Эрон томонидан тақдим этилган янги тинчлик таклифи кўриб чиқилиши, бироқ ушбу лойиҳа самарали келишувга олиб келишига ишончи пастлигини билдирди. Унинг фикрича, Теҳрон Вашингтон учун муҳим ҳисобланган талабларни ҳалигача қабул қилмаган.
Эронга яқин манбалар 14 банддан иборат ҳужжат Покистон орқали етказилганини айтган. Ушбу таклиф АҚШнинг 9 бандли режасига жавоб сифатида жўнатилган. Бинобарин, расмий Теҳрон ҳозирча бу борада баёнот бергани йўқ.
Америка Қўшма Штатлари ва Эрон ўртасидаги музокара давом этаётган бир пайт, уч ҳафталик ўт очишни тўхтатиш келишуви ҳамон амалда. Айни чоғ Ҳурмуз бўғози атрофидаги вазият кескинлиги сақланиб турибди: Эрон кемалардан ўтиш учун тўлов жорий этиш таклифини киритган. Вашингтон эса буни “жаҳон иқтисодиётига босим” дея баҳолади.
АҚШ маъмурияти халқаро ташувчиларни Эронга тўлов амалга оширмасликка чақириб, бундай ҳаракат санкцияга сабаб бўлишини таъкидлаган. Шу билан бирга Америка ҳарбий-денгиз кучлари Эрон портларига нисбатан қамал чорасини кучайтириб, бир неча ўнлаб кемани орқага қайтаргани маълум қилинди. Шу тариқа минтақадаги геосиёсий таранглик янада авж олган.
Мусулмон Зиё, ЎзА
