Toni Kroos Ronalduning ketishidan keyingi Portugaliya termasi haqida: endi ularni so‘zlariga qarab emas, yutuqlariga qarab baholashadi
Germaniyalik mashhur sobiq futbolchi Einfach mal Luppen podkastida chiqish qildi.
Germaniya terma jamoasi tarkibida 2014 yilgi jahon chempionligini qo‘lga kiritgan taniqli sobiq yarim himoyachi Toni Kroos hujumchi Krishtianu Ronaldu xalqaro faoliyatini yakunlaganini e’lon qilganidan so‘ng, Portugaliya termasining kelajagi borasida o‘z fikrlari bilan o‘rtoqlashdi.
«Avvalo, Portugaliyani tabriklayman. Agar sizlarning maqsadingiz Krishtianu Ronaldusiz olg‘a intilish bo‘lgan bo‘lsa, bunga erishdingiz. Yillar davomida aynan Krishtianu sababli Portugaliya jamoasida qiyinchiliklar yuzaga kelayotgani ta’kidlab kelindi. Kimdir usiz jamoa yaxshiroq o‘yin ko‘rsatishini aytsa, boshqalar u bilan yoki usiz o‘yinda farq yo‘qligini iddao qildi. Juda yaxshi — endi ular buni amalda isbotlashlari kerak bo‘ladi.
Shu daqiqadan boshlab terma jamoaga Krishtianuning ketishidan keyin erishadigan natijalariga qarab baho beriladi. Agar ular haqiqatan ham Ronaldu jamoaning o‘sishiga to‘sqinlik qilgan deb hisoblashgan bo‘lsa, unda endi navbatdagi Yevropa chempionatida zafar quchishlari va keyingi jahon chempionatlarida bosh sovrin uchun jiddiy kurashishlari shart. Futbol qonuniyati shunday: so‘zlar natijalar bilan mustahkamlanishi lozim. Ronaldu portugal futboli mentalitetini o‘zgartirishda ulkan rol o‘ynaganini va mamlakat tarixidagi eng nufuzli chempionliklarni qo‘lga kiritishda yordam berganini barchamiz yaxshi bilamiz.
Endi Krishtianu atrofidagi barcha bahs-munozaralar ortda qoldi. Bor diqqat-e’tibor hozirgi avlod futbolchilariga qaratiladi. Ularni quruq gaplar emas, qo‘lga kiritilgan kuboklar orqali baholashadi. Zero, futbol bahonalarni emas, titullarni eslab qoladi», — dedi Kroos.
