Теҳрон халқаро аэропорти 58 кунлик танаффусдан сўнг очилди
Яқин Шарқдаги кескинлик сабаб икки ой ишламаган Теҳрондаги Имом Ҳумайний халқаро аэропортида тижорат парвозлари яна жонланмоқда. Бинобарин, минтақавий сиёсат бу тикланишга қандай таъсир кўрсатиши ҳали номаълум.
Рейслар қарийб икки ойлик чекловдан сўнг босқичма-босқич тикланмоқда. АҚШ – Исроил ҳарбий ҳаракати сабаб тўхтаб қолган ҳаво қатнови 25 апрелдан эътиборан қайта йўлга қўйилди. Бу ҳақда “Al Jazeera” нашри хабар берган.
Ҳозир 8 маҳаллий авиакомпания Истанбул, Масқат, Мадина, шунингдек Хитой ва Россияга – жами 15 йўналиш бўйича парвоз амалга оширмоқда. Парвоз жадаллиги ҳали урушдан олдинги даражага чиққани йўқ: илгари аэропорт кунига ўртача 150 рейсга хизмат кўрсатган бўлса, бугунги кунда фаоллик анча паст.
Эрон фуқаро авиацияси хизмати маълумотига кўра, қуролли тўқнашув оқибатида мамлакатнинг 20 самолёти йўқ қилинган. Инфратузилма жиддий зарар кўрмаган, 95 фоиз ишчи ҳолатда сақланган. Аэропорт шаҳарчаси раҳбари Рамин Кошиф Озор таъкидлаганидек, хорижий авиакомпанияларнинг Эрон бозорига қайтиши бевосита минтақадаги сиёсий барқарорлик ва хавфсизлик кафолатига боғлиқ.
Маълум қилинишича, Эрон ҳаво ҳудуди 19 апрелдан бошлаб босқичма-босқич очилган. Дастлаб транзит рейслар учун йўлак тақдим этилган. Сўнгра ички қатнов тикланиб, кейин халқаро парвозга рухсат берилган. Энди тижорат фаолияти тўлиқ йўлга қўйиляпти. Шунга қарамай, Теҳрон ва Вашингтон ўртасида сақланиб қолаётган сиёсий кескинлик хорижий авиаташувчилар қарорига ҳамон сезиларли таъсир кўрсатмоқда.
Ф.Яхшибоева, ЎзА
