Ташкент облысында жаңа туристік кешен ашылды

Ташкент облысында туризм саласын дамыту, өңірлердің туристік әлеуетін тиімді пайдалану, ішкі және сыртқы туризмге арналған заманауи инфрақұрылым қалыптастыру бағытында жүйелі жұмыстар атқарылып келеді. Әсіресе, бұл үдерісте таулы аймақтардың табиғи мүмкіндіктерін тиімді пайдаланып, жаңа демалыс орындарын ашуға ерекше мән беріліп отыр.

Осы үрдіске сәйкес Паркент ауданында пайдалануға берілген заманауи «Silver Valley» отбасылық демалыс кешені осындай ірі жобалардың бірі.

Ташкент облысының қайталанбас тау көріністері, таза ауасы мен көрікті табиғатымен танымал Күміскен аумағында орналасқан кешен 29,5 гектар жерді алып жатыр. Жеке инвестиция есебінен жүзеге асырылған жоба заманауи сәулеттік шешімдер, жайлылық пен экологиялық талаптардың үйлесімі негізінде салынған.

Кешенде қонақтарды қабылдап, сапалы қызмет көрсету үшін барлық қажетті жағдай жасалған. Атап айтқанда, 120 орындық 12 шале, заманауи мейрамхана, «Yurta» атауымен 12 мейрамхана-киіз үй, сауна мен бассейндер, ұлттық нақыштағы киіз үйлер, спорт және балалар алаңдары ұйымдастырылған.

[gallery-30972]

Сонымен қатар аумақта заманауи ойын-сауық инфрақұрылымы да қарастырылған. Атап айтқанда, зиплайн және тюбинг аттракциондары, жазғы кинотеатр, фотозоналар, серуендеу және пикник алаңдары демалушылардың уақытын қызықты әрі мазмұнды өткізуіне мүмкіндік береді.

суреттерді түсірген А.Алижонов, ӨзА