Тадбиркор аёллар “Заковат”да беллашди
ФОТОРЕПОРТАЖ
“Hamroh” хотин-қизлар тадбиркорлигини қўллаб-қувватлаш компанияси “Заковат” интеллектуал клуби билан ҳамкорликда Қорақалпоғистонда илк бор тадбиркор аёллар учун интеллектуал ўйин ўтказди.
Интеллектуал баҳсларда Қорақалпоғистон Республикасининг барча туманлари ва Нукус шаҳридан 34 та жамоа таркибида 204 нафар тадбиркор хотин-қиз иштирок этди. Ўйиннинг умумий соврин жамғармаси 36 миллион сўмни ташкил этди.
Очилиш маросимида Ўзбекистон Республикаси Бош вазири ўринбосари — Оила ва хотин-қизлар қўмитаси раиси Дилноза Каттахонова, давлат ва жамоат ташкилотлари вакиллари, “Hamroh” жамоаси, шунингдек, “Заковат” интеллектуал клуби вакиллари иштирок этди.
– Тадбиркорлик ҳар куни маълумотларни таҳлил қилиш, тез қарор қабул қилиш ва бошқалар билан ҳамкорликда ишлаш қобилиятини талаб қилади, - дейди “Hamroh” компанияси бош директори Дилфуза Нурматова. – Шунинг учун “Заковат” биз учун шунчаки интеллектуал ўйин эмас. Балки, тадбиркор аёллар учун бир-бирининг кучли томонларини кўриш, янги форматда танишиш ҳамда қўшма ғоя ва лойиҳалар яратиш имконидир.
[gallery-31390]
Ўйин давомида жамоалар кучли учликдан жой олиш учун кураш олиб борди. Мусобақа якунига кўра, Нукус туманининг “Арулар” жамоаси биринчи, Қонликўл туманининг “Янги Қонликўл” жамоаси иккинчи, Амударё туманининг “Мулкхоним” жамоаси учинчи ўринни эгаллади.
Мақсад ҲАБИБУЛЛАЕВ (сурат), ЎзА
