Superligada oyning eng yaxshi murabbiysi aniqlandi
Iyul oyida qayd etilgan natijalarga ko‘ra, ushbu sovrin uchun to‘rt nafar tajribali mutaxassis nomzod sifatida ko‘rsatildi.
O‘zbekiston Superligasida iyul oyi yakunlari bo‘yicha eng yaxshi murabbiy nomiga da’vogarlar ro‘yxati e’lon qilindi. Chempionat ikkinchi davrasi hal qiluvchi bosqichga kirib borayotgan bir paytda har bir ochkoning ahamiyati yanada ortib, jamoalarning natijalarida bosh murabbiylarning taktik yechimlari hal qiluvchi omilga aylanmoqda.
Iyul oyida qayd etilgan natijalarga ko‘ra, ushbu sovrin uchun to‘rt nafar tajribali mutaxassis nomzod sifatida ko‘rsatildi.
«OKMK» bosh murabbiyi Mirjalol Qosimov jamoasini uchrashuvlarning barchasida g‘alabaga olib chiqdi. Olmaliqliklar oy davomida raqiblar darvozasiga yo‘l topib, o‘z darvozasidan to‘rtta gol o‘tkazib yubordi. Bu natija jamoaning chempionlik uchun kurashdagi da’vosini yanada mustahkamladi.
Farg‘onaning «Neftchi» klubi bosh murabbiyi Islom Ismoilov rahbarligidagi jamoa esa uch o‘yinda ikki g‘alaba va bir durang qayd etib, 8:3 to‘plar nisbatiga erishdi. Barqaror o‘yin va yuqori samaradorlik «Neftchi»ning peshqadamlar safidagi o‘rnini saqlab qolishiga xizmat qildi.
Samarqandning «Dinamo» klubi ustozi Vadim Abramov ham iyul oyini yuz foizlik natija bilan yakunladi. Uning shogirdlari uchala bahsda ham zafar quchib, raqiblar darvozasiga yettita gol urdi.
Qarshining «Nasaf» jamoasi bosh murabbiyi Ro‘ziqul Berdiyev esa ikki g‘alaba va bir durang bilan oyni muvaffaqiyatli o‘tkazdi. Mudofadagi ishonchli o‘yin natijasida jamoa uch uchrashuvda atigi ikkita gol o‘tkazib yubordi.
Superligada har bir tur chempionlik va sovrinli o‘rinlar uchun kurashni yanada keskinlashtirayotgan bir paytda oyning eng yaxshi murabbiysi nomiga da’vogarlar ro‘yxati ham mutaxassislar va muxlislar e’tibor markazida turibdi. Ushbu sovrin nafaqat qayd etilgan natijalar, balki jamoaning o‘yin uslubi, barqarorligi va murabbiyning taktik mahoratiga berilgan munosib bahoni ham anglatadi.
Javohir Toshxo‘jayev, O‘zA
