Sirk san’atini rivojlantirishga e’tibor kuchaytirilmoqda
Ayni kunlarda mamlakatimizda ijodiy birlashmalar faoliyatining ustuvor yo‘nalishlarini belgilash, ish samaradorligini oshirish, ijodkorlarni qo‘llab-quvvatlash hamda soha rivoji uchun yangi imkoniyatlar yaratishga alohida e’tibor qaratilmoqda.
Shu maqsadda sirk san’ati ijodiy birlashmasining faoliyati ham o‘rganildi. Unda O‘zbekiston Respublikasi Prezidentining madaniyat bo‘yicha vakili Hasan Salixov, madaniyat vazirining birinchi o‘rinbosari Nodirbek Sayfullayev, sirk san’ati ijodiy birlashmasi ijrochi direktori Rustam Xametov, soha mutaxassislari hamda homiylar ishtirok etdi.
Uchrashuvda Sirk san’ati ijodiy birlashmasining joriy faoliyati, amalga oshirilayotgan ishlar, mavjud imkoniyatlar va istiqboldagi rejalar muhokama qilindi. Xususan, tomosha dasturlarini takomillashtirish, zamonaviy sirk san’atini rivojlantirish, ijodiy jamoalar faoliyatini qo‘llab-quvvatlash hamda sohaning moddiy-texnik bazasini mustahkamlash masalalariga e’tibor qaratildi.
Shuningdek, sirk san’atini rivojlantirishda hamkorlik va homiylik imkoniyatlaridan samarali foydalanish, yangi loyihalarni amalga oshirish hamda sohaning xalqaro aloqalarini kengaytirish yuzasidan takliflar bildirildi.
O‘zbekistonda sirk san’ati ko‘p yillik an’analarga ega bo‘lib, u milliy madaniyatimizning o‘ziga xos va tomoshabop yo‘nalishlaridan biri sifatida alohida ahamiyat kasb etadi.
Bugungi kunda sirk san’atini zamonaviy talablar asosida rivojlantirish, an’anaviy sahna mahoratini yangi ijodiy yondashuvlar bilan uyg‘unlashtirish muhim vazifalardan biri hisoblanadi.
Sirk tomoshalarini mazmunan boyitish va yangi sahnaviy yechimlarni joriy etish orqali tomoshabinlarga yanada qiziqarli va sifatli dasturlarni taqdim etish imkoniyatlarini kengaytirish maqsad qilinmoqda.
Ayniqsa, yosh va iste’dodli ijodkorlarni sirk san’atiga keng jalb etish, ularning kasbiy mahoratini oshirish va ijodiy salohiyatini ro‘yobga chiqarishga alohida e’tibor qaratish zarurligi ta’kidlandi.
Zamonaviy sirk texnologiyalari, sahna bezagi, yoritish va multimedia imkoniyatlaridan samarali foydalanish tomoshalarning badiiy saviyasi va ta’sirchanligini yanada oshirishga xizmat qiladi.
Shu bilan birga, milliy sirk maktabining boy tajribasini asrab-avaylash va uni kelgusi avlodlarga yetkazish soha oldida turgan muhim vazifalardan biri sifatida qayd etildi.
Sirk san’atida milliy obrazlar, an’analar va zamonaviy sahna yechimlarini uyg‘unlashtirish orqali o‘ziga xos ijodiy mahsulotlar yaratish imkoniyatlari ham muhokama qilindi.
O‘zbekiston sirk san’atining xalqaro maydondagi nufuzini oshirish, xorijiy sirk jamoalari va ijodiy tashkilotlar bilan hamkorlikni kengaytirish yangi istiqbollarni ochishi qayd etildi.
Xalqaro festivallar, ijodiy loyihalar va gastrol dasturlarida ishtirok etish o‘zbek sirk san’ati namunalarini keng targ‘ib qilish hamda xorijiy tajribani o‘rganish uchun muhim imkoniyat yaratadi. Shuningdek, sirk san’atini madaniy turizm yo‘nalishi bilan uyg‘unlashtirish, mahalliy va xorijiy sayyohlar uchun qiziqarli tomosha dasturlarini shakllantirish ham soha rivojiga ijobiy ta’sir ko‘rsatishi ta’kidlandi.
Sirk san’atining yanada ommalashuvi nafaqat ijodkorlar uchun yangi imkoniyatlar yaratadi, balki aholining madaniy hordiq chiqarishi va bo‘sh vaqtini mazmunli tashkil etishga ham xizmat qiladi.
Sohada xususiy sektor, tadbirkorlar va homiylar bilan hamkorlikni kuchaytirish esa yangi ijodiy loyihalarni moliyalashtirish, moddiy-texnik bazani yangilash va zamonaviy infratuzilmani shakllantirish imkonini beradi. Shu maqsadda sirk san’atiga qiziquvchi yoshlarni aniqlash, ularni maxsus to‘garak va ta’lim dasturlariga jalb etish hamda kelajakda professional sirk artistlarini tayyorlash tizimini yanada takomillashtirish muhim ahamiyatga ega.
Uchrashuv yakunida Sirk san’ati ijodiy birlashmasi faoliyati samaradorligini oshirish, istiqbolli loyihalarni qo‘llab-quvvatlash va belgilangan vazifalarni izchil amalga oshirish bo‘yicha tegishli vazifalar belgilab olindi.
Kelgusida amalga oshiriladigan chora-tadbirlar milliy sirk san’atini yangi bosqichga olib chiqish, ijodkorlar uchun munosib sharoitlar yaratish va O‘zbekiston sirk san’atining xalqaro maydondagi o‘rnini yanada mustahkamlashga xizmat qilishi kutilmoqda.
N.Usmonova, O‘zA
