Шахмат рейтингида Ўзбекистон юксалди
Халқаро шахмат федерацияси жорий йил октябрь ойи учун янгиланган рейтингни эълон қилди.
Самарқандда зўр муваффақият билан ўтказилган 46-Бутунжаҳон шахмат олимпиадасининг натижалари асосида шаклланган рейтингда Ўзбекистон жамоаларининг ҳам, шахматчиларнинг ҳам кўрсаткичлари аввалги ҳолатидан анча юксалишга эришди.
Маҳоратли шахматчимиз Нодирбек Абдусатторов уч ойлик танаффусдан сўнг Самарқандда ажойиб ўйин кўрсатиб, биринчи тахтада шахсий олтин медални қўлга киритди ва +18 рейтинг очкосига эга бўлган ҳолда ФИДЕ рейтингида 2779.5 балл билан 5-ўринни банд этди.
Ўз навбатида омадли шахматчимиз Жавоҳир Синдоров 2781.5 балл билан ТОП-100 ликнинг 4-поғонасидаги ўрнини мустаҳкамлади.
Биз учун эътиборли жиҳати, шахмат олимпиадасида бир неча бор Ўзбекистон терма жамоасига ғалаба юришини туҳфа этган Нодирбек Ёқуббоев илк бор +27 рейтинг очкосини тўплади ва фаолиятида биринчи марта 2700 баллдан ошиқ нуқтага кўтарилди.
Октабр ойининг жаҳон шахмат рейтингида Магнус Карлсен 2823 рейтинг билан 1-ўринда, Ҳикару Накамура ва Фабиано Каруана кейинги кучли учликни эгаллаб турибди.
Халқаро шахмат федерацияси (FIDE) эълон қилган давлатлар рейтинг рўйхатида Ўзбекистон бир поғона юқорилаб, 5-ўринни эгаллади.
Терма жамоамизнинг энг кучли 10 нафар шахматчисининг ўртача рейтинги 2637 ни ташкил этмоқда.
Миллий федерациялар рейтинги АҚШ, Ҳиндистон, Хитой ва Россия кучли тўртликни ташкил этмоқда.
Аёллар жамоалари рейтингида 10 нафар шахматчи қизларимизнинг ўртача рейтинги 2236 га етиши туфайли Ўзбекистон аёллар терма жамоаси бир поғона кўтарилиб, ТОП-100ликда 20-ўринга чиқди.
Т. Рўзиев, ЎзА
