Шахмат олимпиадаси: 6-турда Ҳиндистон жамоаси мағлуб этилди

Кутилганидек, 46-Бутунжаҳон шахмат олимпиадасининг 6-тур баҳслари Ўзбекистон-1 терма жамоаси учун ҳам, Ҳиндистон жамоаси учун ҳам ҳар жиҳатдан мураккаб, кучли руҳий босим остида кечди.

Маҳоратли шахматчиларимиз ўз уйида, минг-минглаб юртдошларимизнинг ўткир нигоҳлари қаршисида дона суриш масъулиятини оширган бўлса, ҳиндистонликлар Самарқандда Ўзбекистоннинг асосий жамоасига қаршилик кўрсатиши уларнинг руҳиятига таъсир қилмай қолмади.

Ўта ҳаяжонли кечган Ўзбекистон-1-Ҳиндистон қарама-қаршилигининг биринчи тахтасида ҳаракатланган Нодирбек Абдусатторов Праггнанандҳа билан, Жавоҳир Синдоров Аржун Эригайиси билан, Шамсиддин Воҳидов амалдаги жаҳон чемпиони Гукеш Доммараджу билан дурангга эришиши ҳар икки жамоа учун Нодирбек Ёқуббоев-Ниҳал Сарин қарама-қаршилиги ҳаёт-мамот масаласини ҳал этадиган баҳс кўринишини олди.

[gallery-31542]

Истеъдодли шахматчимиз Нодирбек Ёқуббоевнинг 25 юришдан бошлаган позицион ҳаракати алалоқибат 38-юриш ҳолатида Саринни муқаррар мағлубият кўчасига бошлади.

Бу ўз навбатида, ҳужумкор вазиятга чиқиб олган Ёқуббоевга Сарин устидан ғалаба қозониш имкониятини тақдим этди.

Айнан Нодирбек Ёқуббоевнинг ғалаба қозониши ортидан Ўзбекистон-1 жамоаси Ҳиндистонни 2,5:1,5 кўринишида енгиб, 12 очко билан турнир жадвалидаги етакчилик ўрнини мустаҳкамлашига замин яратди.

Мазкур турда Ўзбекистон-1 жамоасининг асосий таъқибчиларидан бири Германия вакиллари Хитой жамоасига 3:1 ҳисобида мағлуб бўлди.

Т. Рўзиев, А. Мамадаминов (сурат) ЎзА