Шахмат: Икки нафар вакилимиз жаҳон чемпионлигига яқин
Сербиянинг Врнячка-Баня шаҳрида 8 ёшдан 18 ёшгача бўлган шахматчилар ўртасида ўтказилаётган ФИДЕ жаҳон чемпионатининг блиц йўналишида дастлабки 6 тур ўйинлари якунланди.
Бугун, 20 апрель куни 40 та давлатдан 450 нафардан зиёд спортчи иштирок этаётган мазкур мусобақанинг сўнгги 7–11-тур баҳслари бўлиб ўтади ва ғолиблар номи аниқланади.
Ҳал қилувчи баҳслар олдидан Ўзбекистон терма жамоаси аъзолари Муҳаммадюсуф Баҳромов 6 очко билан (8 ёшгача бўлган ўғил болалар ўртасида) ва Муҳаммадзоҳид Суяров 5,5 очко билан (18 ёшгача бўлганлар ўртасида) ўз гуруҳларида турнир жадвалини бошқариб бормоқда.
Шунингдек, ўз ёш тоифаларида Афруза Ҳамдамова, Комилжон Муртазаев, Ҳумоюн Бекмуродов, Фарзонабону Бозорова ҳамда Ҳуснорахон Ҳусниддинова 2-ўринни эгаллаб турибди ва чемпионлик учун асосий даъвогарлар қаторида қайд этилган.
Эслатиб ўтамиз, Сербиядаги мазкур нуфузли чемпионатнинг рапид йўналишида ҳамюртимиз Афруза Ҳамдамова 8,5 очко жамғариб, навбатдаги жаҳон чемпионлигини қўлга киритган эди.
Т. РЎЗИЕВ, ЎзА
