Шахмат: Бугун Нодирбек Ёқуббоев Магнус Карлсен билан куч синашади
Бугун, 6 апрель куни Германияда мукофот жамғармаси 285 минг евродан иборат “Grenke Chess Festival-2026” турнирининг 8-турида маҳоратли шахматчимиз Нодирбек Ёқуббоев оқ доналарда норвегиялик Магнус Карлсен билан куч синашади.
Жаҳон шахмат ишқибозлари эътиборида бўлган турнирнинг “Freestyle оpen” гуруҳида ортда қолган 6 ва 7-турлардан кейин 5,5 очко жамғарган гроссмейстерларимиз Нодирбек Абдусатторов 8-ўрин, Нодирбек Ёқуббоев 10-ўринда ҳаракатланмоқда.
Нодирбек Абдусатторов 6-турда қора доналарда германиялик Даниэль Хасрат, 7-турда россиялик Ян Непомняший билан муроса йўлини танлади. Ёқуббоев эса оқ доналарда украиналик Александр Бортник билан дуранг қайд этди. Ҳиндистонлик Кришнан Сасикирандан устун келди.
7-турда Магнус Карлсен билан дуранг ўйнаган германиялик Винсент Кеймер 6,5 очко билан якка пешқадамга айланди. Сербиялик Алексей Сарана, француз Максим Вашье-Лаграв ва ҳиндистонлик Пранав 6 очко билан кейинги поғоналарни банд этган.
Шунингдек, терма жамоамиз аъзоларидан Шамсиддин Воҳидов 4,5 очко билан 52, 4 очкога эга Афруза Ҳамдамова 83-ўринда ҳаракатланмоқда.
Бугун кун давомида ўтадиган 8-турда Абдусатторов қора доналарда франциялик Гата Камскийга, Шамсиддин Воҳидов ҳиндистонлик Сива Маҳадеванга, Афруза Ҳамдамова германиялик Марк Мейерсга қарши дона суради.
Т.Рўзиев,
ЎзА
