«Salar» tozalash inshootidagi noxush hid bartaraf etildi

Toshkent shahar hokimligi “Salar” tozalash inshootlari atrofidagi yoqimsiz hidni bartaraf etish uchun 9,5 milliard so‘mlik filtrlash tizimi o‘rnatilganini ma’lum qildi.

<uzb> Toshkent shahar hokimligi xabariga ko‘ra, oqova suv havzalari germetik yopilib, havoni tozalash uskunalari 15 kundan buyon muvaffaqiyatli ishlamoqda. "Toshkent shahar suv ta’minoti" bosh texnologi Do‘nonboy Qozibekovning ta’kidlashicha, Sergeli, Yangihayot, Mirobod va Yashnobod tumanlaridan oqova suvlar qabul qiluvchi ushbu inshootga Rossiyadan keltirilgan uch bosqichli filtrlash tizimi o‘rnatilgan.

Havo ventilyatorlar yordamida tortib olinib, 11,5 tonna katalitik sorbentdan o‘tkaziladi. Ultrabinafsha nurlanish yordamida havo ozonlashtiriladi va oksidlanadi. Yakuniy bosqichda havo 2,5 tonna faollashtirilgan ko‘mir orqali tozalanadi.

Natijada, chiquvchi havodagi vodorod sulfid va ammiak konsentratsiyasi nol darajaga tushirilgan.

Ma’lumot o‘rnida, Prezidentimiz avvalroq Sergeli va Yangihayot tumanlaridagi noxush hid muammosini 1-sentyabrga qadar bartaraf etish bo‘yicha topshiriq bergan edi. Shuningdek, Toshkent viloyatida sutkasiga 1 million kub metr oqova suvni qayta ishlash quvvatiga ega yangi tozalash inshootini qurish bo‘yicha xorijiy konsorsium bilan yirik loyiha amalga oshirilmoqda.

Shahnoza Mamaturopova,

O‘zA </uzb>