Руслан Абдуллаев профессионал боксдаги тўртинчи ғалабасини нишонлади
АҚШнинг Калифорния штатида профессионал бокс оқшоми ўтказилди. Ушбу кечада ҳамюртимиз Руслан Абдуллаев навбатдаги жангини ўтказди.
Аниқроқ айтадиган бўлсак, Руслан ўзининг профессионал рингдаги тўртинчи жангида уругвайлик Эдуардо Хавьер Абреу билан тўқнаш келди. Саккиз раундга мўлжалланган жанг бешинчи раундда рефери томонидан тўхтатилди. Ушбу вазиятда кетма-кет кучли зарбалар йўллаган чарм қўлқоп устамиз Эдуардони нокдаун ҳолатига тушириб қўйди.
Шу тариқа, Руслан Абдуллаев техник нокаут эвазига профессионал бокс фаолиятидаги тўртинчи ғалабасига эришди. 37 ёшли Эдуардо Хавьер Абреу эса иккинчи мағлубиятини қабул қилиб олди.
Жавоҳир Тошхўжаев, ЎзА
