Руминия элчиси: Спорт мамлакатларимиз ўртасидаги дўстлик ришталарини янада мустаҳкамламоқда
Аввал хабар қилганимиздек, пойтахтимизда 24 мингдан зиёд иштирокчи қатнашган II “Tashkent International Half Marathon” халқаро ярим марафони ўтказилди. Мусобақа 5 километрлик оммавий югуриш ҳамда 21,0975 километрлик ярим марафон масофаларида ташкил этилиб, якунда ғолиблар номи эълон қилинди.
Эътиборлиси, мазкур марафонда спортчилардан ташқари, давлат ва жамият арбоблари, зиёлилар ва юртимиздаги дипломатик миссия вакиллари ҳам қатнашди.
Хусусан, Руминиянинг мамлакатимиздаги Фавқулодда ва мухтор элчиси Даниэль Кристиан Чобану ушбу халқаро ярим марафонда 5 километрлик масофага югуриш баҳсида қатнашиб, “Tashkent International Half Marathon” халқаро спорт ҳамкорлигини мустаҳкамлашга хизмат қилишини таъкидлади ва тадбирнинг юқори савияда ташкил этилганига алоҳида эътибор қаратди.
Элчи Ўзбекистон ва Руминия ўртасида спорт соҳасидаги икки томонлама муносабатларни ривожлантириш ҳақида сўз юритар экан, ўзбекистонлик гроссмейстер Жавоҳир Синдаровнинг жорий йил 14–24 май кунлари Бухарест шаҳрида ўтказилган нуфузли “Super Chess Classic Romania 2026” турнирида салмоқли ўринни эгаллаганини қайд этди.
Шунингдек, у ўлкамиз бадиий гимнастика терма жамоасининг 2026 йил 26–28 июнь кунлари Руминиянинг Клуж-Напока шаҳрида бўлиб ўтган “World Challenge Cup” жаҳон кубоги босқичидаги муваффақиятли иштироки ва Ўзбекистон қизлар терма жамоасининг 29 июль – 9 август кунлари Руминияда ўтказилган 18 ёшгача бўлган қизлар ўртасидаги гандбол бўйича жаҳон чемпионатида қатнашганини эътироф этди.
Ў.Алимов, ЎзА
