Россия, Украина ва АҚШ музокараси Абу-Дабида бўлиб ўтади (+видео)
АҚШ воситачилигида Россия ва Украина ўртасида ўтказиладиган музокаранинг янги босқичида “урушдан кейинги хавфсизлик, кескинликни юмшатиш, инсонпарварлик ташаббуслари ва тинчликка эришиш йўлидаги кейинги қадамлар” муҳокама қилинади. Бу ҳақда Президентнинг махсус вакили Стив Уиткофф маълум қилди, дея хабар берган DW.
Мазкур учрашув Бирлашган Араб Амирликлари пойтахти Абу-Дабида 10-11 ноябрь кунларига белгилангани ҳам қўшимча қилинган.
– Муҳокама урушдан кейинги хавфсизлик, кескинликни юмшатиш, гуманитар ташаббуслар ва тинчликка эришиш йўлидаги кейинги қадамларга қаратилади, – деб ёзган Уиткофф ижтимоий тармоқда.
Аниқлик киритилишича, мулоқот Президент Дональд Трампнинг Россия ва Украина урушига барҳам бериш йўлидаги саъй-ҳаракати доирасида ўтказилади.
АҚШ иттифоқчилари билан Европанинг урушдан кейинги хавфсизлик тизимини муҳокама қилади.
Махсус вакил айтишича, шу ҳафта америкалик музокарачилар Брюсселда Франция, Германия, Буюк Британия, Европа Иттифоқи ва НАТО вакиллари билан ҳам суҳбатлашади.
Учрашувда “Украина учун хавфсизлик кафолати, урушдан кейинги Европанинг хавфсизлик тизими ва Украина тикланишини иқтисодий қўллаб-қувватлаш имконияти” муҳокама қилинади.
– Биз Киев, Осло ва Санкт-Петербургда эришилган натижани мустаҳкамлаб, келажак авлод учун узоқ муддатли хавфсизликни таъминлайдиган кенг қамровли ва барқарор тинчлик келишувига эришиш йўлида олға силжишдан умидвормиз, – деди Уиткофф.
Октябрь ойида у Норвегия пойтахтида Президент Владимир Зеленский билан учрашган. Кейин Санкт-Петербургга бориб, РФ етакчиси Владимир Путин билан музокара ўтказган.
Қўшма Штатлар воситачилигида Россия ва Украина ўртасидаги аввалги музокара шу йил февралда, АҚШ ва Исроилнинг Эронга қарши уруши бошланишидан бироз олдин бўлиб ўтган эди.
Кенжа Бекжонов, Анвархўжа Аҳмедов (видео), ЎзА
