Профессионал бокс: Руслан Абдуллаев Калифорнияда жанг ўтказади
Ўзбекистонлик профессионал боксчи Руслан Абдуллаевнинг навбатдаги жанги тафсилотлари эълон қилинди.
Golden Boy промоутерлик компанияси хабарига кўра, ҳамюртимиз 21 июнь тонгида АҚШнинг Калифорния штати, Ошенсайд шаҳридаги “Frontwave Arena” мажмуасида ташкил этиладиган бокс оқшомида рингга кўтарилади.
Эслатиб ўтамиз, Абдуллаев профессионал боксда бугунгача 4 та жанг ўтказиб, уларнинг барчасида ғалаба қозонган.
Жаҳонгир Зокиров “Zuffa 8” турнирида
Жиззах бокс мактаби тарбияланувчиси Жаҳонгир Зокиров жорий йилнинг 28 июнь куни АҚШнинг Лас-Вегас шаҳридаги “The Chelsea at the Cosmopolitan” аренасида ташкил этиладиган “Zuffa 8” турнирида рингга чиқиши кутилмоқда.
Профессионал боксда ҳозирча битта жанг ўтказиб, ғалабага эришган Жаҳонгир учун ушбу баҳс “Zuffa 8” турниридаги дебют жанги ҳисобланади.
Отабек Холматов WBC рейтингида
Бутунжаҳон бокс кенгаши (WBC) ярим енгил вазн тоифаси учун эълон қилган янгиланган рейтингда ҳамюртимиз Отабек Холматов номи қайд этилди.
Ушбу вазн тоифасида фаолият олиб бораётган боксчимиз Отабек Холматов июнь ойи учун янгиланган рейтингда 16-ўринни банд этди. У бунга қадар тўққизинчи поғонани эгаллаб келаётганди.
Ярим енгил вазн тоифасидаги WBC йўналиши чемпиони америкалик Брюс Каррингтон ҳисобланади.
Отабек профессионал боксдаги охирги жангини ўтган йилнинг ноябрь ойида Қозоғистонда филиппинлик Жейсон Канойга қарши ўтказиб, ғалаба қозонганди. У фаолияти давомида 14 та жанг ўтказиб, 13 та ғалаба ва 1 та мағлубиятга эришган.
Т.Рўзиев,
ЎзА
