"Президент олимпиадаси": Оғир атлетика мусобақасининг илк ғолиблари аниқланди
Шу кунларда пойтахтимиздаги “Олимпия шаҳарчаси”, Республика олимпия ва паралимпия спорт турларига тайёрлаш маркази мажмуаларида ҳамда Ўзбекистон давлат жисмоний тарбия ва спорт университети майдонларида “Президент олимпиадаси” мусобақаларининг республика финал босқич мусобақалари ўтказилмоқда.
Кеча Республика олимпия ва паралимпия спорт турларига тайёрлаш марказида оғир атлетика бўйича 13-14 ёшли спортчилар ўртасида дастлабки мусобақалар ўтказилди.
Илк кунги баҳсларда ўғил болалар 44 килограммда, ёш оғир атлетикачи қизлар -36 кило оғирликдаги мусобақаларда ўз омадларини синовдан ўтказди.
Оғир атлетика бўйича қизлар ўртасида -36 кг. вазн тоифасининг даст кўтариш баҳсларида Қашқадарё вилояти вакили Дилфуза Йўлдошева ғолибликни қўлга киритган бўлса, кейинги ўринлар навоийлик Сарвиноз Аширбекова ва хоразмлик Шабнамой Маҳмудовага насиб этди.
Мусобақанинг силтаб кўтариш мусобақаларида совринли ўринлар Шабнамой Маҳмудова, Дилфуза Йўлдошева ва Сарвиноз Аширбековага тегишли бўлди.
Ўғил болалар ўртасида -44 кг. вазн тоифасидаги курашларда самарқандлик Жонибек Худойбердиев даст кўтаришда 1-ўринни, қашқадарёлик Наврўзбек Раҳмонқулов 2-ўринни, Тошкент вилояти вакили Диёрбек Мирзатиллаев 3-ўринни эгаллади. Силтаб кўтариш машқларида эса Наврўзбек Раҳмонқулов ва Диёрбек Мирзатиллаев етакчиликка эришган вазиятда сурхондарёлик Жуманазар Хушвақтов 3-ўрин эгасига айланди.
Биринчи кунги мусобақалар якунига кўра, Қашқадарё жамоаси 2 та олтин медаль билан умумжамоада етакчилик қилаётган бўлса, 1 тадан олтин медални қўлга киритган Хоразм ва Самарқанд жамоалари кейинги поғоналарни эгаллаб турибди.
Бугун, 28 октябрь куни оғир атлетика мусобақаларининг иккинчи кунида ёш спортчи қизлар -40 ва -45 килода, ўғил болалар -50 ва -55 килограмм вазн тоифасидаги баҳсларда совринли ўринларга даъвогарлик қилади.
Эслатиб ўтамиз, “Президент олимпиадаси”нинг оғир атлетика баҳслари 31 октябрга қадар давом этади.
Т.Рўзиев,
ЎзА
