Польшада Мустақиллик куни оммавий намойишлар билан нишонланди
Польша президенти Кароль Навроцкий ўта ўнг қараш тарафдорлари томонидан ташкил этилган ўлканинг Мустақиллик куни муносабати билан ўтказилган тадбирда иштирок этди. Таъкидланишича, унда ярим миллиондан ортиқ киши қатнашган.
Варшавада мамлакат мустақиллиги тикланганининг 108 йиллиги муносабати билан ўтказилган анъанавий «Мустақиллик марши» Роман Дмовский номидаги майдондан бошланиб, Миллий стадион ҳудудигача давом этди.
Президент йиғиндан олдин пойтахтнинг Пилсудский майдонида ўтказилган расмий маросимда нутқ сўзлади. Унда мамлакат мустақиллиги, миллий бирлик ва давлат хавфсизлигини таъминлаш масалаларига алоҳида эътибор қаратди.
Навроцкий таъкидлашича, Польша суверенитети ва мустақиллиги сиёсий ҳамда партиявий қарама-қаршиликлардан устун туриши керак. Давлат раҳбари мамлакат хавфсизлигини таъминлашда сиёсий кучлар ўртасида ҳамжиҳатлик зарурлигини қайд этди.
«Reuters» агентлиги хабар беришича, намойиш давомида айрим иштирокчилар ҳукуматнинг миграция сиёсатига қарши шиорлар кўтарган. Юриш ташкилотчилари миллий суверенитет ва поляк халқининг ўз мамлакатидаги мавқеини ҳимоя қилиш ғояларини илгари сурган. Бош вазир Дональд Туск ҳукуматига яқин марказчи сиёсий кучлар эса мазкур тадбирда миллатчилик ва муҳожирларга қарши кайфиятлар намоён бўлаётганини танқид қилган.
Намойиш хавфсизлик чоралари кучайтирилган шароитда ўтказилди. Ҳуқуқни муҳофаза қилувчи органлар пойтахтнинг марказий кўчаларида қўшимча полиция кучларини жойлаштирди. Айрим иштирокчилар тақиққа қарамай пиротехника воситаларидан фойдаланган бўлса-да, расмийлар жиддий тартибсизликлар қайд этилмаганини маълум қилди.
О.Акабоев, ЎзА
