Полина Кудерметова ва Мария Тимофеева финалга йўл олди

Хитойнинг Гуанчжоу шаҳрида теннис бўйича WTA 250 туркумига кирувчи “Guangzhou Open” халқаро мусобақаси қизғин паллага кирди. Унда Ўзбекистон номидан Полина Кудерметова ва Мария Тимофеева жуфтлик баҳсларида муваффақиятли иштирок этиб, финал йўлланмасини қўлга киритди.

Ҳамюртларимиз ярим финалда индонезиялик Жанис Тжен ва америкалик Венус Уильямс жуфтлигига қарши кортга чиқди. Муросасиз кечган учрашувда Мария ва Полина 6:4, 6:7 (8:10), 10:6 ҳисобида ғалаба қозонди.

Мазкур ғалаба орқали Полина Кудерметова ва Мария Тимофеева мусобақанинг ҳал қилувчи босқичига йўл олди. Қайд этиш жоиз, америкалик Венус Уильямс ушбу мусобақада жуфтлик баҳсларида илк бор саккиз йилдан буён WTA турнири ярим финалида иштирок этаётган эди.

Энди ҳамюртларимиз финалда Тайвань вакиллари И-Хсуан Чо ва И-Цен Чо жуфтлигига қарши баҳс олиб боради. Учрашув 1 ноябрь куни ўтказилиши режалаштирилган.

Жавоҳир Тошхўжаев,

ЎзА