Покистон: АҚШ ва Эрон келишувга яқин (+видео)
Яқин вақт ичида АҚШ ва Эрон урушни тўхтатиш бўйича меморандум юзасидан келишувга эришиши мумкин, деб хабар берди DW нашри.
Шунингдек, бу ҳақда Reuters агентлигига Покистондаги воситачилик жараёнларига яқин манба маълум қилган. Манба бошқа нашрларда чиққан шу каби хабарларни ҳам тасдиқлаган.
АҚШ ва Эрон ўртасидаги музокараларда воситачи сифатида иштирок этаётган Покистон ҳукумати томонларнинг ҳарбий ҳаракатларни тўхтатиш бўйича келишувга яқинлашганини билдирди. Урушни тўхтатиш ҳақидаги меморандум бўйича келишув яқин кунларда имзоланиши мумкинлиги айтилмоқда. Айни пайтда АҚШ маъмурияти Эрон билан эҳтимолий келишув бўйича расмий баёнот бермаган.
Маълумотларга кўра, АҚШ махсус вакили Стив Уиткофф ҳамда Трампнинг куёви Жаред Кушнер Эрон расмийлари билан тўғридан-тўғри ва воситачилар орқали музокаралар олиб бормоқда. Музокара 14 банддан иборат меморандум юзасидан кечмоқда.
Нашрнинг америкалик амалдорлар ва жараёндан хабардор манбаларга таяниб ёзишича, ҳужжат 30 кун давомида батафсил келишув ишлаб чиқиш учун расмий музокаралар ўтказилишини назарда тутади. Шу муддат ичида Эрон томонидан Ҳурмуз бўғозидаги кемалар ҳаракатига қўйилган чекловлар ва АҚШнинг Эрон портларига нисбатан блокадаси босқичма-босқич бекор қилиниши режалаштирилган.
Бундан ташқари, АҚШ Эрондан уранни бойитишни вақтинча тўхтатиш бўйича мораторийга рози бўлишини кутмоқда. Эвазига Вашингтон санкцияларни юмшатиши ва миллиардлаб долларлик музлатилган Эрон активларини озод қилиши мумкин. Агар музокаралар муваффақиятсиз якунланса, АҚШ блокада ёки ҳарбий ҳаракатларни қайта тиклаши мумкин.
Шунингдек, Вашингтон Эрондан 48 соат ичида жавоб кутаётганлиги айтилади. Теҳрон ҳам ўз навбатида бу таклифни ўрганмоқда. Аввалроқ Эрон ахборот агентликлари Эроннинг ўзи ҳам АҚШга 14 бандли тинчлик режасини тақдим этганини хабар қилган эди.
<iframe width="640" height="420" src="https://www.youtube.com/embed/0YcCw8zg8tM" title="Pokiston: AQSH va Eron kelishuvga yaqin" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe> Кенжа Бекжонов, Улуғбек Тўхтаев (видео), ЎзА
