Ўзбекистонликлар орасида пул жамғаришга қизиқиш ортмоқда
Ўзбекистонда аҳолининг пул жамғаришга бўлган мойиллиги ортиб бормоқда. Бу ҳақда Марказий банк томонидан 2025 йилнинг IV чораги бўйича ўтказилган сўров натижаларида маълум қилинди.
Сўров давомида аҳолининг пул жамғариш ва қарз олишга бўлган муносабати ўрганилди. Натижаларга кўра, иштирокчиларнинг 62,6 фоизи келгусида жамғарма миқдори ортишига ишонч билдирган. Яна 24,2 фоиз респондент жамғармалари ҳажми ўзгаришсиз қолишини билдирган бўлса, 13,2 фоизи маблағлари камайишини кутаётганини қайд этган.
Шу билан бирга, иштирокчиларнинг 40,4 фоизи жамғармаси йўқлигини маълум қилган. 2025 йилнинг III чорагида мазкур кўрсаткич 38 фоизни ташкил этган. Демак, жамғармага эга бўлмаганлар улуши 2,4 фоизга ошган.
Сўров натижаларига кўра, иштирокчиларнинг 34,1 фоизи бир ойгача бўлган жамғармага эга эканини билдирган. Шунингдек, 3–6 ойгача етарли жамғармаси борлар улуши бир оз кўпайган. Бироқ, 1–3 ойлик ва 6 ойдан ортиқ муддатга етарли жамғармаси бор фуқаролар улуши ўтган чоракка нисбатан камайган.
Марказий банк томонидан аҳолининг кредитга бўлган муносабати ҳам ўрганилди. Сўров иштирокчиларининг 54 фоизи келаси 12 ой ичида банкдан кредит олишга эҳтиёжи борлигини билдирган. Бу кўрсаткич аввалги чоракка нисбатан бироз юқори экани қайд этилди.
Таҳлилларга кўра, кредитга бўлган энг юқори талаб ойлик даромади 7–10 миллион сўм бўлган аҳоли қатламида кузатилмоқда. Даромади 20 миллион сўмдан юқори бўлган фуқаролар орасида эса кредит олишга бўлган талаб бироз камайган.
Қатнашчилар банк кредитларини асосан уй-жой таъмири, таълим харажатлари ва автомобиль хариди учун сарфлашни режалаштираётганини билдирган.
Аҳоли орасида пул жамғариш ва молиявий режалаштиришга бўлган қизиқишнинг ортиши иқтисодий фаоллик кучаяётганини кўрсатади. Бу эса келгусида аҳолининг молиявий барқарорлиги мустаҳкамланишига хизмат қилиши мумкин.
Шаҳноза Маматуропова,
ЎзА
