Ўйинчоқлар хавфсизлигига 200 та янги талаб жорий этилади
Ўзбекистон техник жиҳатдан тартибга солиш агентлигида ўйинчоқ маҳсулотлари ишлаб чиқарувчи тадбиркорлар иштирокида очиқ мулоқот ўтказилди.
Тадбир Президент томонидан техник жиҳатдан тартибга солиш соҳасида давлат органлари ва тадбиркорлар ўртасида тизимли мулоқотни таъминлаш бўйича белгиланган вазифалар ижроси ҳамда Тадбиркорлар куни арафасида ташкил этиладиган очиқ мулоқотга тайёргарлик доирасида ташкил этилди.
Тадбирда соҳада амалга оширилаётган ислоҳотлар, маҳсулотлар сифати ва хавфсизлигини таъминлаш, маҳаллий ишлаб чиқарувчиларнинг экспорт салоҳиятини ошириш ҳамда халқаро стандартларни жорий этиш бўйича олиб борилаётган ишлар атрофлича муҳокама қилинди.
Мулоқот давомида Президентимизнинг 2026 йил 16 февралдаги ПФ–25-сон фармони асосида техник жиҳатдан тартибга солиш соҳасида амалга оширилаётган кенг кўламли ислоҳотлар тақдим этилди. Хусусан, тадбиркорларга экспорт бозорларида хорижий стандартлар асосида мувофиқликни баҳолаш имконияти яратилгани, аккредитация йиғимлари 2,5 баробарга қисқартирилгани, миллий стандартлар ихтиёрий асосга ўтказилгани ҳамда халқаро стандартларни тўғридан-тўғри қўллаш амалиёти жорий этилгани таъкидланди.
Йиғилишда болалар учун ишлаб чиқариладиган ўйинчоқ маҳсулотлари хавфсизлигини таъминлаш масаласига алоҳида эътибор қаратилди. Қайд этилишича, амалдаги техник регламент 222 та хавфсизлик кўрсаткичини қамраб олган бўлса, халқаро талаблар асосида ишлаб чиқилаётган янги техник регламентга қўшимча қарийб 200 та хавфсизлик талаби киритилиши режалаштирилган. Мазкур ҳужжатни 2028 йилдан амалиётга жорий этиш кўзда тутилган.
Шунингдек, бугунги кунда республикада ўйинчоқ маҳсулотларини синовдан ўтказиш имкониятига эга 34 та аккредитациядан ўтган лаборатория фаолият юритаётгани маълум қилинди. Айни пайтда ушбу лабораторияларнинг техник имкониятларини янада кенгайтириш, замонавий ускуналар билан жиҳозлаш ҳамда халқаро талабларга мос янги синов турларини йўлга қўйиш ишлари изчил давом этмоқда.
2026 йилда савдо тармоқларида ўтказилган назорат харидлари натижасида текширилган 60 турдаги ўйинчоқ маҳсулотининг 26 тасида хавфсизлик талабларига номувофиқликлар аниқланган. Бу эса ички бозорда сотилаётган маҳсулотлар сифатини кучли назорат қилиш ва истеъмолчилар, айниқса болалар хавфсизлигини таъминлаш бўйича чораларни янада кучайтириш зарурлигини кўрсатади.
Очиқ мулоқотда экспорт имкониятларини кенгайтиришга қаратилган янги механизмлар ҳам тақдим этилди. Жумладан, Чехия Республикасида ташкил этилган «Made in Uzbekistan» шоуруми, Европа Иттифоқининг CE маркировкасини олишда маҳаллий ишлаб чиқарувчиларга кўрсатилаётган амалий кўмак, шунингдек, техник жиҳатдан тартибга солиш соҳасини рақамлаштириш доирасида TRIS миллий ахборот тизими ва номувофиқ маҳсулотлар реестрининг имкониятлари ҳақида батафсил маълумот берилди.
Очиқ мулоқот якунида тадбиркорларнинг таклиф ва ташаббуслари тингланди. Билдирилган фикр ва мулоҳазалар техник жиҳатдан тартибга солиш тизимини янада такомиллаштириш, ўйинчоқ маҳсулотлари хавфсизлигини таъминлаш, халқаро стандартларни кенг жорий этиш ҳамда маҳаллий ишлаб чиқарувчиларнинг экспорт салоҳиятини оширишга қаратилган амалий чора-тадбирларни белгилашда инобатга олиниши таъкидланди.
Ш.Маматуропова,
ЎзА
