Осиё ўйинлари: Соҳил волейболида ҳамюртларимиз Қозоғистон жамоасини мағлуб этди

ХХ ёзги Осиё ўйинлари доирасидаги соҳил волейболи баҳсларида Ўзбекистон эркаклар терма жамоаси аъзолари Азамат Дауилбаев/Дилшодбек Толибоев жуфтлиги гуруҳ босқичидаги навбатдаги учрашувда муваффақиятга эришди.

Юртдошларимиз соҳил волейболининг “G” гуруҳидаги мураккаб кечган ўйинда Қозоғистон терма жамоаси аъзолари Муҳаммадов/Яковлев жуфтлигини 2:1 ҳисобида мағлуб этди.

Учрашувнинг биринчи даврасида ҳамюртларимиз 21-14 ҳисобида мағлуб бўлган бўлса, қолган 2 та ўйинда, 16-21 ва 12-15 кўринишида устунликка эришди.

Энди юртдошларимиз гуруҳ босқичидаги навбатдаги ўйинни Япония терма жамоасига қарши ўтказади.

Соҳил волейболи дастурига мувофиқ, Ўзбекистон-Япония терма жамоалари иштирокидаги баҳс 25 сентябрь куни ўтказилади.

Эслатиб ўтамиз, гуруҳ босқичининг илк ўйинида ҳамюртларимиз Хитой жамоасига 0:2 ҳисобида, Қозоғистон жамоаси эса 1:2 кўринишида Японияга очко тақдим этганди.

ХХ ёзги Осиё ўйинларининг соҳил волейболи мусобақалари 3 октябрга қадар давом этади.

Т. Рўзиев, ЎзА