Орбансиз Венгрия, Москвасиз энергия – Кремлга қарши юришнинг баҳоси
Венгриянинг янги ҳукумати Россияни мамлакат ва Европа хавфсизлигига таҳдид, дея баҳолагач, Москвадан кутилган кескин муносабат янгради. РФ Давлат думаси Мудофаа қўмитаси аъзоси Андрей Колесник Будапешт янгича ташқи сиёсат юритишда давом этиши Москвадан келадиган нефть ва газ таъминотини хавф остида қолдириши мумкинлигини билдирди.
Бош вазир Петер Мадьяр бошчилигидаги “Тиса” партияси апрель ойида Орбан ҳукуматини мағлуб этгандан кейин мамлакат ташқи сиёсатида бурилиш юз берди. Будапешт Европа Иттифоқи ва НАТО билан яқинлашиши, Украина суверенитети ва ҳудудий яхлитлигини қўллаб-қувватлашини айтиб, РФнинг ҳатти-ҳаракати Венгрия, Европа ва халқаро тартибга хавф солаётганини таъкидлади.
Шундан сўнг Колесник Венгрияга рус нефти ва бошқа энергия ресурслари етказиб берилиши тўхташи мумкинлигига урғу берди. Тўғри, ҳозирча Венгрия РФ нефти ва табиий газини мислсиз ҳажмда импорт қилаётган ЕИ давлатлардан бири бўлиб турибди: 2022 йил Россиядан қувур орқали нефть олиб кириш бўйича жорий этилган санкцияга Будапешт ва Братислава истисно олган. Айни ҳолат энергетика масаласини икки давлат муносабатида муҳим босим воситасига айлантириши мумкин.
Орбан даврида Будапешт Москва билан яқин алоқани сақлаган, Россия Венгрияга таҳдид солмаслиги таъкидлаб келинган. Янги ҳукумат Кремлдан узоқлашишга интилиши эса муносабатга янгича тус бермоқда. РФ Ташқи ишлар вазирлиги ҳозирча янги раҳбарият билан прагматик муносабатга тайёрлигини билдирган эса-да, Колесник баёноти Москва учун энергетика масаласи сиёсий босим воситаси бўлиб қолиши мумкинлигини кўрсатади.
Мусулмон Зиё, ЎзА
