Онкологияда янги авлод ёндашуви
Республика ихтисослаштирилган онкология ва радиология илмий-амалий тиббиёт маркази қошидаги "Gustave Roussy International" Ўзбекистон тиббиёт марказида Ёш онкологлар ва радиологлар қўмитаси томонидан навбатдаги илмий-таълим семинари ташкил этилди.
«Пушти октябрь» ойлиги доирасида ўтказилган мазкур тадбир кўкрак бези саратонини скрининг қилиш, замонавий диагностика ҳамда персоналаштирилган (индивидуал) даволашнинг долзарб масалаларига бағишланди.
Семинар давомида ёш мутахассислар ўзларининг илмий-тадқиқот ва амалий натижалари билан ўртоқлашди. Хусусан, марказнинг 1-курс клиник ординатори Малика Шавкаталиева «Кўкрак бези саратони скрининги ва диагностикаси» мавзусида маъруза қилиб, касалликни эрта босқичларда аниқлаш, замонавий скрининг усуллари ҳамда диагностик ёндашувларнинг клиник аҳамиятига батафсил тўхталиб ўтди.
– Касалликни нафақат даволаш, балки уни ўз вақтида, яъни клиник аломатлар юзага келгунига қадар эрта босқичларда аниқлаш бемор ҳаётини сақлаб қолишнинг энг асосий гаровидир, — дейди Малика Шавкаталиева. – Бугунги кунда замонавий скрининг усуллари ҳамда рақамли диагностика имкониятларидан кенг фойдаланиш орқали патологик ўзгаришларни жуда эрта босқичдаёқ аниқлаш ва даволаш самарадорлигини кескин ошириш имкониятига эгамиз. Шу боис ҳар бир аёл мунтазам равишда профилактик кўриклардан ўтишини одат қилиши лозим.
Шунингдек, 2-курс клиник ординатори Светлана Фокина томонидан тақдим этилган «Уч карра негатив кўкрак бези саратонида персоналлаштирилган терапия: тизимли даволашни танлашда BRCA1/2, PALB2, PIK3CA, TP53 мутациялари ва молекуляр профиллашнинг ўрни» мавзусидаги маъруза қатнашчиларда катта қизиқиш уйғотди. Унда молекуляр-генетик текширувлар натижалари асосида беморлар учун индивидуал даволаш тактикасини шакллантириш ва замонавий тизимли терапияни танлаш масалалари муҳокама қилинди.
– Бугунги кунда онкология ва радиология фани стандарт ёндашувлардан босқичма-босқич воз кечиб, ҳар бир беморнинг генетик хусусиятига асосланган аниқ тиббиёт — персоналлаштирилган терапия сари шиддат билан бормоқда. Айниқса, кўкрак бези саратонининг энг хавфли ва даволаш мураккаб ҳисобланган турларида молекуляр-генетик текширувлар, хусусан, BRCA1/2 ёки бошқа мутацияларни ўрганиш терапия самарадорлигини оширишда ҳал қилувчи аҳамият касб этмоқда.
Ёш шифокорлар ва клиник ординаторларнинг бундай чуқур илмий изланишларга кенг жалб этилиши юртимизда келажакдаги юқори малакали онкологлар авлодини шакллантиришда муҳим пойдевор бўлиб хизмат қилади.
Бугунги семинарда нафақат назарий билимлар, балки амалиётда бевосита қўлланилаётган замонавий молекуляр профиллаш усуллари муҳокама қилинди. Ёшларимизнинг бу каби илғор йўналишларга қизиқиши юқори экани ва ўз илмий изланишларини амалиётга боғлай олаётгани мамлакатимизда саратон касалликларига қарши курашиш тизими янги босқичга кўрилаётганидан далолат беради, – дейди тиббиёт фанлари номзоди О.Толипов.
Дарҳақиқат, бу каби тадбирлар ёш мутахассисларнинг илмий ва клиник салоҳиятини ошириш, кўкрак бези саратонини эрта аниқлаш бўйича илғор ёндашувларни ўзлаштириш ҳамда онкология ва радиология соҳасида самарали тажриба алмашишда муҳим аҳамият касб этади.
Семинарда мамлакатимизнинг етакчи онкологлари, маммологлари, кимётерапевтлари радиологлари ҳамда ёш тадқиқотчилар фаол иштирок этиб, соҳадаги сўнгги янгиликлар юзасидан фикр алмашди.
Моҳигул Қосимова, ЎзА
