ОКМК Moodyʼs агентлигидан «Ba2» даражасида, «Барқарор» прогноз билан кредит рейтингини олди
«Олмалиқ КМК» АЖ Moodyʼs агентлигидан «Ba2» даражасида, «Барқарор» прогноз билан кредит рейтингини ва «ba3» даражасидаги мустақил кредит баҳосини (БCА) олди. Рейтинг Ўзбекистон Республикасининг суверен рейтинги («Ba2»/прогноз «Барқарор») билан бир даражада белгиланган ва хорижий валютадаги мажбуриятлар бўйича мамлакатдаги энг юқори даража ҳисобланади.
Шу билан бирга агентлик комбинатнинг мустақил кредит баҳосини (Baseline Credit Assessment, BCA) “ba3” даражасида белгилади. Мазкур кўрсаткич давлат томонидан қўллаб-қувватлаш омилларини ҳисобга олмаган ҳолда компаниянинг ўз молиявий ва операцион салоҳиятига асосланган кредит қобилиятини акс эттиради.
«Олмалиқ КМК» АЖ Ўзбекистоннинг тоғ-кон саноатидаги Moodyʼs томонидан кредит рейтингига эга бўлган биринчи компания бўлди. Бу мамлакат саноатининг етакчи корхоналари учун халқаро капитал бозорларига чиқиш йўлидаги муҳим қадамдир.
Агентлик комбинатнинг давлат билан мустаҳкам алоқаларини, йирик ресурслар базасини, маҳсулот турлари бўйича диверсификация ва таннарх бўйича қулай мавқеини, шунингдек ишлаб чиқариш ҳажмларининг ўсишини таъминловчи инвестиция дастурининг амалга оширилаётганини қайд этди.
ЎзА
