Оила фаровонлиги ва жамият тараққиётида аёлнинг ўрни
Кармана туманида хотин-қизларнинг тадбиркорлик борасидаги тажрибаларини оммалаштириш, уларнинг янги ташаббус ва ғояларини қўллаб-қувватлаш мақсадида “Ишбилармон аёл – 2026” кўрик-танловининг туман босқичи бўлиб ўтди.
ЎзЛиДеП Навоий вилояти Кенгаши “Аёллар қаноти” ташаббуси билан ташкил этилган танловда Кармана туманининг турли маҳаллаларида ўз тадбиркорлик фаолиятини йўлга қўйган ишбилармон, ҳунарманд ва ташаббускор хотин-қизлар иштирок этди. Улар ўз бизнес лойиҳалари, ишлаб чиқарилаётган маҳсулотлари, хизмат кўрсатиш йўналишидаги фаолияти ва эришган натижаларини намойиш этди.
Иштирокчиларнинг бизнес юритиш тажрибаси, маҳсулотлар сифати, инновацион ёндашуви, иқтисодий самарадорлиги, шунингдек, янги иш ўринлари яратишга қўшаётган ҳиссаси асосий мезонлар орқали баҳоланди.
Тадбир давомида хотин-қизларнинг тадбиркорлик соҳасида эришаётган ютуқлари, жамият ҳаётидаги фаол иштироки ва мамлакатимизда амалга оширилаётган иқтисодий ислоҳотлардаги муносиб ҳиссаси алоҳида эътироф этилди. Иштирокчилар ўзаро тажриба алмашиб, янги ҳамкорлик алоқаларини йўлга қўйиш, тадбиркорлик фаолиятини янада кенгайтириш юзасидан фикр ва таклифлар билдирдилар.
Кўрик-танлов якунига кўра, 1-ўринни замонавий тикувчилик йўналишида фаолият юритаётган “Маҳлиё Ателье” МЧЖ раҳбари Маҳлиё Худойназарова, 2-ўринни қандолат маҳсулотлари, миллий ширинликлар ва ярим тайёр маҳсулотлар ишлаб чиқариш билан шуғулланаётган “Асал” МЧЖ раҳбари Муҳаррам Расулова ва 3-ўринни кўрпа-тўшак ва матрас ишлаб чиқариш йўналишида фаолият олиб бораётган тадбиркор Дилобар Пўлатова эгаллади.
Танлов ғолиб ва совриндорлари, шунингдек, фаол иштирокчилар диплом ҳамда қимматбаҳо эсдалик совғалари билан тақдирланди.
А.Бўриев, ЎзА мухбири
