Мундиал: Франция рекорд ўрнатди, Мексика тарих ёзди
2026 йилги Жаҳон чемпионатида Мбаппе рекордни янгилади, Ҳоланд Норвегияни қутқарди.
АҚШ, Канада ва Мексика мезбонлик қилаётган 2026 йилги футбол бўйича Жаҳон чемпионатида плей-офф баҳслари давом этмоқда. Навбатдаги учрашувлар якунига кўра, Норвегия, Франция ва Мексика терма жамоалари мусобақанинг нимчорак финалига йўлланма олди.
Норвегия — Кот-д'Ивуар 2:1
Европа ва Африка вакиллари ўртасидаги баҳс муросасиз курашлар остида кечди. Ҳисобни 39-дақиқада Антонио Нуса очди. Иккинчи бўлимда захирадан майдонга тушган Амад Диалло 74-дақиқада мувозанатни тиклади. Бироқ, учрашув тақдирини 86-дақиқада Эрлинг Ҳоланд ҳал қилди. Рақиб ҳимоясидаги бўшлиқдан унумли фойдаланган Ҳоландга ғалаба голига муаллифлик қилди.
Франция — Швеция 3:0
Франция терма жамоаси Швецияни ишончли тарзда мағлуб этди. Килиан Мбаппе 45 ва 74-дақиқаларда дубль қайд этган бўлса, яна бир гол Брэдли Барколя ҳисобига ёзилди. Майкл Олисе эса икки марта голли узатма бериб, жамоасининг йирик ғалабасида муҳим ўрин тутди.
Бу натижа орқали Дидье Дешам шогирдлари нимчорак финалга чиқди ва энди Парагвайга қарши майдонга тушади. Учрашув 5 июль куни Тошкент вақти билан соат 02:00 да бошланади.
Французлар ушбу ғалаба билан бир қатор тарихий натижаларни ҳам қайд этди. Squawka маълумотига кўра, Франция Жаҳон чемпионатлари тарихида кетма-кет бешта ўйинда камида учтадан гол урган биринчи терма жамоага айланди.
Шунингдек, Килиан Мбаппе мундиаллар тарихида еттита учрашувда икки ёки ундан кўп гол урган илк футболчи сифатида рекорд ўрнатди. У жорий мусобақада тўрт ўйинда олти бор рақиблар дарвозасини ишғол қилди.
Яна бир эътиборли натижа — Килиан Мбаппе ва Усман Дембеле жуфтлиги жаҳон чемпионатлари тарихидаги 60 йиллик рекордни янгилади. Дембеленинг узатмасидан кейин Мбаппе киритган гол уларнинг мундиаллардаги ҳамкорлиги самарасида урилган олтинчи гол бўлиб, 1966 йилдан буён қайд этилаётган энг яхши кўрсаткичга айланди.
Мексика — Эквадор 2:0
Мусобақа мезбонларидан бири Мексика ҳам мухлисларини ишончли ғалаба билан хурсанд қилди. Эквадорга қарши ўйинда Хулиан Киньонес 22-дақиқада ҳисобни очган бўлса, 31-дақиқада Рауль Хименес устунликни мустаҳкамлади.
Мазкур ғалаба орқали мексикаликлар нимчорак финалга чиқди ва энди Конго ДР — Англия жуфтлиги ғолиби билан баҳс олиб боради.
Мексика ушбу учрашувда яна бир тарихий натижа қайд этди. Терма жамоа Жаҳон чемпионатлари тарихида кетма-кет бешинчи ўйинда биринчи бўлиб ҳисобни очган ягона жамоага айланди.
Айни пайтга келиб, нимчорак финалнинг учта жуфтлиги маълум бўлди. Унга кўра, Франция — Парагвай, Марокаш — Канада ҳамда Бразилия — Норвегия терма жамоалари чорак финал йўлланмаси учун ўзаро баҳс олиб боради.
Мундиалнинг 1 июль кунги дастуридан Англия — Конго ДР (21:00), Бельгия — Сенегал (01:00) ва АҚШ — Босния ва Герцеговина (05:00) терма жамоалари ўртасидаги ўйинлар ўрин олган. Дарвоқе, учрашув вақтлари мамлакатимиз вақти билан кўрсатилган. Шу боис ҳам икки учрашув 2 июль санасига тўғри келади.
Жавоҳир Тошхўжаев,
ЎзА
