Москва Лондонни Украинадаги можарони кескинлаштиришда айблади
РФ Бирлашган Қиролликни Украинадаги низони янада кескинлаштиришда айбламоқда. Бунга Британияда ишлаб чиқарилган дронларнинг Россия ҳудудидаги нишонларга зарба беришда қўллангани сабаб бўлди. Москва Лондонни можаронинг бевосита шериги сифатида кўраётганини қайд этиб, бундай ҳаракатлар “оқибатсиз қолмаслиги”дан огоҳлантирди.
Қироллик Мудофаа вазирлиги бу босимга қарамай, Киевни қўллаб-қувватлашдан чекинмаслигини урғулади. Лондон позицияси ўзгармаган: Украина Россияга қарши туриши учун зарур ҳарбий воситалар билан таъминланади.
Гап Британиянинг икки компанияси ишлаб чиқарган учувчисиз қурилмалар ҳақида кетмоқда. Улар нефтьни қайта ишлаш корхоналари, ҳарбий ва саноат объектлари ҳамда омборларга қилинган ҳужумларда ишлатилган. Зарба оқибатида етказилган иқтисодий зарар 35 миллиард фунтдан ошгани қайд этилмоқда.
Айни пайтда Россия-Украина ўртасида ҳаво ҳужумлари ҳам авж олган. РФ расмийларига кўра, Москва томон 620 га яқин дрон йўналтирилган, уларнинг 180 дан ортиғи уриб туширилган. Запорожьеда эса Россия зарбалари камида икки кишининг ҳаётига зомин бўлди. Британия апрелда Киевга ўн минглаб учувчисиз қурилма, шу жумладан узоқ масофадаги нишонларга зарба бера оладиган қуролларни етказиб бериш режасини эълон қилган эди.
Мусулмон Зиё, ЎзА
