Moody’s “Ўзагросуғурта” АЖ рейтингини Ba2 даражасига оширди
Халқаро Moody’s Ratings рейтинг агентлиги “Ўзагросуғурта” АЖнинг Суғурталовчининг молиявий барқарорлиги рейтингини — Insurance Financial Strength Rating (IFSR) — Ba3 даражасидан Ba2 даражасига оширди.
Шунингдек, рейтинг прогнози “ижобий”дан “барқарор”га янгиланди.
Бу Moody’s Ratings компаниянинг эришилган юқори рейтинг даражаси яқин истиқболда барқарор сақланишини кутаётганини англатади. Рейтингнинг оширилиши Ўзбекистон Республикасининг суверен кредит рейтинги яхшилангани, шунингдек, “Ўзагросуғурта” АЖнинг ўз кредит кўрсаткичлари мустаҳкамлангани билан изоҳланади.
Moody’s Ratings баҳосига кўра, компания активларининг ўсиши, капитал базасининг мустаҳкамланиши ҳамда молиявий мослашувчанликнинг ошиши “Ўзагросуғурта” АЖнинг молиявий барқарорлигини янада кучайтирган. Агентлик, шунингдек, компаниянинг Ўзбекистон суғурта бозоридаги барқарор мавқеини, суғурта маҳсулотлари портфелининг диверсификациялашганини, изчил фойдали фаолият юритаётганини ҳамда суғурта мажбуриятларини бажариш учун етарли капитал захирасига эга эканини қайд этди.
Moody’s Ratings томонидан рейтингнинг Ba2 даражасига оширилиши “Ўзагросуғурта” АЖнинг молиявий барқарорлиги, танланган ривожланиш стратегиясининг самарадорлиги ва мамлакат суғурта бозоридаги мустаҳкам ўрнининг халқаро миқёсдаги эътирофидир.
