Мингечевирда Ўзбекистон ва Озарбайжон ҳамкорлигида янги тўқимачилик лойиҳасига старт берилди
Бу ҳақда “Ўзтўқимачиликсаноат” уюшмаси ахборот хизмати маълум қилди. Хабарда қайд этилишича, Озарбайжоннинг Мингечевир саноат паркида Ўзбекистон ва Озарбайжон компаниялари иштирокида янги тўқимачилик мажмуасини ташкил этиш бўйича йирик инвестиция лойиҳаси амалга оширила бошланди.
Жорий йилнинг 26 сентябрь куни мазкур лойиҳага расмий старт берилди. Тадбирда Озарбайжон Президенти Илҳом Алиев, “Azersheker” МЧЖ Кузатув кенгаши раиси Насиб Исломзода ҳамда Ўзбекистоннинг “Global Textile Group” компанияси раиси Музаффар Раззоқов иштирок этди. Улар корхона қурилиши бошланишини ифодаловчи рамзий тугмани босди.
“Textile Horizon” МЧЖ лойиҳасида Ўзбекистон-Озарбайжон инвестиция жамғармаси, Ўзбекистоннинг “Global Textile” МЧЖ ҳамда Озарбайжоннинг “Azersheker” МЧЖ таъсисчи сифатида иштирок этмоқда.
Янги мажмуа 11,2 гектар майдонда жойлашади. Унда пахта етиштиришдан бошлаб, маҳсулот ишлаб чиқаришгача бўлган жараёнларни бирлаштирувчи тўлиқ ишлаб чиқариш занжири йўлга қўйилади. Жумладан, линт, ип-калава, бўялган мато ва тайёр кийим-кечак маҳсулотларини ишлаб чиқариш назарда тутилган.
Корхона тўлиқ қувватда ишлаганида бир йилда 16 минг тонна линт, 11 минг тонна ип-калава ва 7,3 минг тонна бўялган мато ишлаб чиқариши мумкин бўлади. Шунингдек, йиллик тайёр маҳсулот ҳажми 11 миллион дона кўйлакни ташкил этади.
Лойиҳа доирасида ишлаб чиқарилган маҳсулотларни Озарбайжон ички бозорига етказиб бериш билан бирга, ташқи бозорларга экспорт қилиш ҳам режалаштирилган.
Мазкур ташаббус икки давлат ўртасидаги тўқимачилик саноатида саноат кооперациясини кенгайтириш, инвестициявий алоқаларни мустаҳкамлаш ва қўшма ишлаб чиқариш лойиҳаларини кўпайтиришга қаратилган. Лойиҳанинг амалга оширилиши Ўзбекистон ва Озарбайжон компаниялари ўртасида янги ҳамкорлик йўналишларини шакллантириш учун ҳам имконият яратади.
Н.Зиёдуллаева, ЎзА
