Макрон хантавирусга қарши курашда ЕИни ҳамжиҳатликка чақирди (+видео)
Франция президенти Эммануэль Макрон мамлакатдаги эпидемиологик вазият бўйича ҳукумат тўғри қарорлар қабул қилганини ва бугунги кунда вазият назорат остида эканини маълум қилди. Шу билан бирга, у Европа Иттифоқи давлатларини энг қатъий стандартларга жавоб берадиган бир хил тартиб-қоидалар жорий этишни таклиф қилди, деб хабар берди Euronews.
Найробида ўтказилган матбуот анжуманида қатнашган Макрон Африка қитъаси аҳолисини ҳам тинчлантиришга уринди.Унинг айтишича, Францияда хантавирус – яъни кемирувчилар орқали юқадиган хавфли вирусли касаллик билан оғриган ягона аёл бемор ҳали ҳам оғир аҳволда реанимацияда қолмоқда. Мамлакатдаэса вирусга алоқадор тахминан йигирмата шундай ҳолат аниқланган.
Макроннинг таъкидлашича, ҳукумат тиббиёт ходимлари ёрдамида инқирозни назорат остига олган. Париж, айниқса Мадрид билан ҳамкорликда, мутахассислар тавсияси асосида энг қатъий санитария тартиб-қоидаларини жорий этган.
Франция раҳбари бу масалани Европа Иттифоқи ва Жаҳон соғлиқни сақлаш ташкилоти даражасида кучли мувофиқлаштириш зарурлигини таъкидлади.
Франция соғлиқни сақлаш вазири Стефани Рист мамлакат ҳудудида одамдан одамга юқиши мумкин бўлган анд хантавирус штаммининг кенг тарқалиши кузатилмаганини билдирди. Унинг сўзларига кўра, аниқланган ҳолатлар асосан круиз кемаси йўловчилари билан боғлиқ. Вазирнинг айтишича, вирус аниқланган франциялик аёлда касалликнинг энг оғир юрак-ўпка шакли кузатилмоқда. У сунъий нафас олдириш ва қонни сунъий кислород билан таъминлаш тизимига уланган.
Ҳукумат маълумотига кўра, Францияда 22 нафар касал билан яқин мулоқотда бўлган шахслар аниқланган. Барчаси текширувдан ўтказилган ва кузатув остига олинган. Улар орасида болалар ҳам бор, ҳозирча беморларнинг аҳволи яхши деб баҳоланмоқда.
Франция Миллий жамоат саломатлиги агентлиги раҳбари Каролин Семайль анд хантавируси илк бор 1995 йилда Аргентинада аниқланганини айтди. Мутахассисларнинг фикрича, вирус асосан ҳайвондан инсонга юқади. Одамдан одамга юқиши кам учрайди ва бу асосан яқин мулоқот ёки нафас йўллари орқали содир бўлиши мумкин.
Мутахассисларнинг таъкидлашича, дастлабки белгилар чарчоқ, бош оғриғи ва енгил тушкунлик каби оддий белгилар билан бошланади. Кейин ҳароратнинг кўтарилиши ва ўпка шикастланиши кузатилади. Ҳозирча бу касалликка қарши вакцина ёки самарали даво мавжуд эмас. Шу сабабли соғлиқни сақлаш идоралари жуда қатъий чоралар кўрмоқда.
<iframe width="640" height="420" src="https://www.youtube.com/embed/ntum7YVJ0t0" title="Makron xantavirusga qarshi kurashda YEIni hamjihatlikka chaqirdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев (видео), ЎзА
