“KyrgyzBuild-2026” қурилиш саноати кўргазмасида Ўзбекистон компаниялари фаол иштирок этмоқда
Айни кунларда Қирғизистон пойтахти Бишкек шаҳрида 23-халқаро ихтисослаштирилган “KyrgyzBuild-2026” қурилиш саноати кўргазмаси бўлиб ўтмоқда.
Қурилиш соҳасидаги етакчи халқаро майдонлардан бири ҳисобланган мазкур кўргазма турли мамлакатлардан 120 дан ортиқ компанияларни бирлаштириб, замонавий технологиялар ҳамда инновацион ечимларни намойиш этиш имконини бермоқда.
Аҳамиятлиси, унда Ўзбекистон компаниялари ҳам фаол иштирок этмоқда. Жумладан, “Made in Uzbekistan” бренди остида фаолият юритаётган AKFA BUILD компанияси ҳам ушбу нуфузли кўргазмада иштирок этиб, Ўзбекистоннинг замонавий саноат салоҳияти ҳамда экспортбоп маҳсулотларини халқаро бозорга кенг намойиш этди.
“Ўзэлтехсаноат” ахборот хизматига кўра, 16 апрель куни ўз ишини якунлайдиган ушбу тадбир Ўзбекистон компаниялари учун халқаро ҳамкорликни мустаҳкамлаш, янги бозорларга йўл очиш ҳамда экспорт салоҳиятини янада кенгайтиришда муҳим аҳамият касб этади.
Н.Зиёдуллаева,
ЎзА
