Кам таъминланган оилаларга 179,2 миллиард сўмлик ижтимоий кэшбек қайтарилди
Харид учун тўланган маблағнинг бир қисми яна фуқаронинг ўзига қайтарилаётганини биласизми? «Ижтимоий ҳимоя ягона реестри»га киритилган фуқаролар белгиланган товарларни харид қилганда 12 фоизлик ҚҚСни ижтимоий кэшбек сифатида қайтариб олиши мумкин. Бу имкониятдан 2026 йилнинг биринчи ярмида 651,3 минг нафар истеъмолчи фойдаланган.
Ижтимоий ҳимояга муҳтож аҳолини қўллаб-қувватлаш, уларнинг кундалик харажатларини енгиллаштириш мақсадида жорий этилган ижтимоий кэшбек механизми ўз самарасини бермоқда. 2026 йилнинг январь–июнь ойларида мамлакатимизда 651,3 минг нафар истеъмолчига қарийб 179,2 миллиард сўмлик қўшилган қиймат солиғи (ҚҚС) қайтариб берилди.
Ижтимоий кэшбек маблағлари ҳудудлар кесимида ҳам сезиларли кўрсаткичларни қайд этган. Хусусан, энг юқори натижалар Андижон вилояти 96,3 миллиард сўм, Тошкент шаҳри 15,2 миллиард сўм, Самарқанд вилояти 14 миллиард сўм ижтимоий кешбек тўлаб берилди.
Мазкур имтиёз «Ижтимоий ҳимоя ягона реестри»га киритилган жисмоний шахслар учун мўлжалланган. 2023 йил 1 майдан бошлаб ушбу тоифага кирувчи фуқаролар чакана савдо объектларидан белгиланган айрим маҳсулотларни харид қилганда одатдаги 1 фоизлик кэшбек ўрнига 12 фоиз миқдоридаги ҚҚСни — ижтимоий кэшбекни қайтариб олиш имкониятига эга.
Бу механизм, айниқса, кам таъминланган оилалар учун озиқ-овқат ва кундалик эҳтиёж товарларини харид қилишда қўшимча молиявий енгиллик яратади. Ижтимоий кэшбекдан фойдаланиш учун фуқаро Soliq мобил иловаси орқали харид чекидаги QR-кодни сканер қилиши лозим. Шу тариқа амалга оширилган харид электрон тарзда тизимда қайд этилиб, белгиланган шартлар асосида ҚҚСнинг бир қисми фуқарога қайтарилади. Муҳими, харид чекини сақлаш ва ундаги QR-кодни ўз вақтида сканер қилиш ижтимоий кэшбекни олиш жараёнида асосий шартлардан бири ҳисобланади.
Қайд этиш жоизки, ижтимоий кэшбек тизими аҳолининг эҳтиёжманд қатламини манзилли қўллаб-қувватлаш, уларнинг харид қобилиятини ошириш ва ижтимоий ҳимоя механизмларини янада кучайтиришга хизмат қилмоқда
Ш. Маматуропова,
ЎзА
