Жавоҳир Синдоров “Naroditsky Memorial Rapid & Blitz” ғолиби
АҚШнинг Шимолий Каролина штатидаги Шарлотт шаҳрида ўтказилган “Naroditsky Memorial Rapid & Blitz” мусобақасининг рапид йўналишида ғолибликка эришган Синдоров нуфузли мусобақанинг блиц баҳсларида ҳам муваффақиятга эришди.
Жорий йилги Жаҳон шахмат тожи учун амалдаги жаҳон чемпиони ҳиндистонлик Доммараджу Гукешга қарши баҳсга ҳозирлик кўраётган Синдоров блиц мусобақаларида 9 имкониятдан 7,5 очко жамғариб, чемпионликни қўлга киритди. Сўнгги турда рейтингда ўзидан юқорида турган америкалик Ҳикару Накамура билан дурангга имзо чекди.
Америкалик Уэсли Со 7 очко билан иккинчи ўринни банд этган бўлса, 6 очкога эга яна бир мезбон шахматчи Этан Шихан 3-ўрин соҳиби бўлди.
Блиц баҳсларидаги чемпионлик эвазига Жавоҳир 6 минг АҚШ долларига эга чиқди. Ушбу мусобақада қатнашган яна бир шахматчимиз Муҳиддин Мадаминов 4,5 очко билан 6-ўринни эгаллади.
Т. Рўзиев, ЎзА
