Жавоҳир бронза, Магнус олтин медаль учун курашади
Бугун, 11 декабрь куни Жанубий Африка Республикасида шахмат бўйича ўтаётган “Freestyle Chess Champion-2025” турнирининг ғолиб ва совриндорлари номи маълум бўлади.
Кеча ўтказилган ярим финал баҳслари кутилган ва кутилмаган натижаларга бойлиги билан алоҳида ажралиб турди.
Жавоҳир Синдоров-Магнус Карлсен ўртасидаги ярим финал баҳси илк турларида томонлар муроса йўлини танлашди. Тай-брейкнинг илк ўйинида ФИДЕ рейтингида етакчилик қилаётган Норвегия вакилининг қўли баланд келди. Иккинчи ўйинда дуранг қайд этилди.
Бугун мукофот жамғармаси 750 минг доллардан иборат турнирнинг финал баҳсида Левон Аронян Магнус Карлсенга қарши дона суради.
Ўз навбатида, ҳамюртимиз Жавоҳир Синдоров Винсент Кеймер билан бронза медали кимга тегишли эканига ойдинлик киритади.
Эслатиб ўтамиз, “Freestyle Chess Champion-2025” турнирида 1-ўринни эгаллаган шахматчи 200 минг, 2-ўрин соҳиби 120 минг ва 3-ўриндан жой олган иштирокчи 80 минг АҚШ доллари билан тақдирланади.
Т.Рўзиев,
ЎзА
