Жаҳон уруши қаҳрамонлари шарафланмоқда (+видео)
Тошлоқ туманидан бўлган Одилжон ота Зокиров 1923 йилда дунёга келган. У 19 ёшида, 1942 йилда урушга юборилди. Ҳолбуки, атиги уч ой илгари урушга акасини кузатишган эди.
– Мен учун биринчи уруш Львов шаҳридан бошланди. Эрта тонгда самолётлар биз турган жойни пулемётдан ўққа тутди. 14 киши ўлиб, 22 таси ярадор бўлди.
Харковдан бошланган жанговар йўлда аста-секин Украина, кейин Польша, Чехословакиядаги жангоҳлардан ўтди. Неча бор яраланди, бомбаланган майдонда қолиб кетди, лекин ҳар доим ирода билан яна жангу жадалга қайтди.
– Йўлда эшелонга бомба ташлашди. Локоматив ишдан чиқди. Мен тупроқ остида қолиб кетибман. Айтишларича, чамаси 2,5 соатдан кейин ҳушимга кела бошлабман. Дастлаб қўлим жизиллаганини сездим. Тери ва суякларим куйган эди. Бироздан сўнг бошимда илиқлик сездим. Чап оёғим ҳам жароҳатланган экан. Ҳамширалар яраларимни боғлашди. Госпиталга боришга кўнмадим, яна урушга кирдим. Кейин Варшава шаҳри, Польша ерларини озод қилдик.
Одилжон Зокиров урушдан ғалаба билан қайтди. У деҳқон фарзанди эди. Яна даласини танлади.
– 40 йиллик умрим дашт ва чўлларда ўтди. Қоратепадан Бўзгача ерларни ўзлаштирдик. Ўзим 3,5 минг гектар ерга пахта экдим. Кейин канал жанубидан 50 гектар ер беришди. Бу ерни ҳам ўзлаштириб, пахтазорга айлантирдим. Шундан кейингина нафақага чиқдим.
Одилжон Зокиров урушда қаҳрамонлик кўрсатган бўлса, тинчлик замонида фидокорона меҳнат қилди.
103 ёшдан ошган отахон қўни-қўшни, маҳалла, туман ёшларига тинчликни қадрлаш ҳақида насихатгўй ва маслахатгўйдир.
Бугун Фарғона вилояти ҳокими Ҳайрулло Бозоров ва жамоатчилик вакиллари Одилжон Зокиров хонадонига келишди. Самимий суҳбат қурдилар. Отахон умр йўли, уруш фожеалари ва тинчлик шукронаси ҳақида тўлқинланиб гапириб берди. Шундан сўнг вилоят ҳокими Ўзбекистон Президенти табригини ўқиб эшиттирди ва пул совғасини топширди. Одилжон ота Зокиров дуога қўл очиб эзгу тилаклар билдирди. Ватан равнақи, халқ фаровонлигини тилаб ҳамда давлат раҳбарига миннатдорчилик билдириб фотиҳа қилди.
Фарғона вилоятида 5 нафар иккинчи жаҳон уруши иштирокчилари ва уларга тенглаштирилганлар бўлиб, барчалари ҳузурига вилоят ҳокими Хайрулло Бозаров ва жамоатчилик вакиллари ташриф буюрдилар. Улардан бири Фатина Шарипова эди.
– 5 ёшимда немисларнинг концлагерида бўлдим. Армия бизни озод қилгач, Ўзбекистонга юборишди. Шу ерда улғайиб, ўқиб ишладим. Ўзбекистон – менинг Ватаним. Кўрсатилаётган ғамхўрлик учун Президентим ва халқимга таъзим қиламан, – дейди Фатина Шарипова.
Ҳарбий куй садолари остида Фатина Шариповага иззат-икром кўрсатилди. Вилоят ҳокими эса Президент табригини ўқиб эшиттирди ҳамда пул совғасини топширди.
Бугун Фарғона шаҳри, Тошлоқ ва Ўзбекистон туманларидаги иккинчи жаҳон уруши қатнашчилари ва унга тенглаштирилганлар хонадонларда шу каби табриклаш тадбирлари бўлиб ўтди.
<iframe width="650" height="420" src="https://www.youtube.com/embed/AE-q1Yr9k60" title="Jahon urushi qahramonlari sharaflanmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Муҳаммаджон Обидов, Элёр Олимов (видео, сурат), ЎзА
