Жаҳон рейтингида Светлана Осипова етакчига айланди

Бутунжаҳон таэквондо федерацияси жаҳон рейтингида Ўзбекистон терма жамоасининг икки вакили – Нажмиддин Қосимхўжаев ва Светлана Осипова доимо юқори ўринларда бўлган.

Бутунжаҳон таэквондо федерацияси июнь ойи учун янгиланган жаҳон рейтингини эълон қилди. Унга кўра, Ўзбекистон миллий терма жамоасининг бир қатор вакиллари ўз вазн тоифаларида кучлилар қаторидан жой олди.

Эътиборли жиҳати, эркаклар ўртасида -74 килограмм вазн тоифасида мамлакатимиз вакили Нажмиддин Қосимхўжаев 213,80 рейтинг очкоси билан жаҳон рейтингидаги пешқадамликни сақлаб қолди. Аёллар ўртасида эса Париж Олимпиадаси совриндори Светлана Осипова +73 килограмм вазн тоифасида 236,60 очко билан рейтингнинг биринчи поғонасига кўтарилди.

Шунингдек, эркаклар ўртасида Жаҳонгир Худойбердиев (54 кг.) еттинчи, Диёрбек Тўхлибоев (68 кг.) ўн биринчи, Жасурбек Жайсунов (80 кг.) олтинчи, Шуҳрат Салаев (87 кг.) тўққизинчи ва Марат Мавлонов (+87 кг.) еттинчи ўриндан жой олган.

Аёллар рейтингида эса Озода Собиржонова (67 кг.) бешинчи ўринни эгаллаб турибди. Мадина Мирабзалова (57 кг.) эса кучли ўнликдан ўрин олган бўлиб, ўнинчи поғонада қайд этилган.

Янгиланган рейтингдан ўрин олган ўзбекистонлик таэквондочилар сонининг ортиб бораётгани юртимизда спорт соҳасига қаратилаётган эътибор самарасидир.

Жавоҳир Тошхўжаев, ЎзА