Жаҳон чемпионати йўлланмасини қўлга киритган гандболчи қизларимиз Хитой билан куч синашади
Қозоғистоннинг Олмаота шаҳрида гандбол бўйича U16 ёш тоифасида ташкил этилган қитъа чемпионати ярим финал ўйинлари сарҳисобига кўра, Ўзбекистон ва Хитой терма жамоалари жаҳон чемпионати йўлланмасига эга чиқди.
Илк бор ташкил этилган чемпионатда Хитой, Ҳонгконг, Эрон, Қозоғистон, Қирғизистон ҳамда Ўзбекистон қизлар жамоалари баҳс олиб борди.
Осиё чемпионатининг ортда қолган ярим финал баҳсларида ўзбекистонлик гандболчи қизлар Қозоғистон жамоасини, Хитой Эрон терма жамоасини мағлуб этиб, финалда рўбарў келиш билан бирга жаҳон чемпионати чипталарига эга чиқди.
Ҳамюртларимиз қозоғистонлик гандболчиларга қарши кечган муросасиз ва шиддатли ўйинда рақибларини 34:32 ҳисобида мағлуб этди.
Айтиш лозим, Ўзбекистон қизлар жамоаси ярим финал ўйинларига қадар Эрон, Қирғизистон ва Ҳонгконг жамоаларини доғда қолдирди.
Энди 18 май куни Осиё чемпионати финалида Хитой ва Ўзбекистон терма жамоаси, 3-4 ўрин учун кечадиган баҳсда Қозоғистон ва Эрон жамоалари баҳс олиб боради.
Т.Рўзиев, ЎзА
