Хитойнинг иқтисодий юксалишига йўл очган киши вафот этди(+видео)
ВВС нашри Хитой Давлат кенгашининг собиқ бош вазири Чжу Жунцзи 97 ёшида вафот этди, деб хабар берди.Чжу Жунцзи Хитойни жаҳон савдосига олиб киришда муҳим роль ўйнаган. Унинг даврида Хитой Жаҳон савдо ташкилотига қўшилди, хорижий инвестициялар жалб қилинди ва хитойлик корхоналар халқаро бозорга чиқди. У иқтисодий ислоҳотларни ҳам жадаллаштирди: зарар келтираётган давлат корхоналарини қисқартирди ёки хусусийлаштирди, солиқ тизимини марказлаштирди ва хусусий уй-жой бозорининг ривожланишига туртки берди.
Чжу Жунцзи қатъиятли ва очиқ гапирадиган раҳбар сифатида танилган. У коррупция, бойлар ва камбағаллар ўртасидаги фарқ ҳамда маҳаллий раҳбарларнинг суиистеъмолларини очиқ танқид қилган. Унинг ислоҳотлари натижасида Хитой иқтисодиёти тез ўсди ва мамлакат йирик саноат давлатига айлана бошлади. Аммо бу жараённинг салбий томони ҳам бўлган: ислоҳотлар даврида 30 миллионга яқин одам ишдан бўшатилган, иқтисодий ўсиш эса бой ва камбағаллар ўртасидаги тафовутни ҳам кучайтирган.
Чжу Жунцзи 1928 йилда Хунань вилоятида туғилган. Муҳандислик маълумотига эга бўлган. 1949 йилда Коммунистик партияга қўшилган. Кейинчалик Мао Цзэдуннинг иқтисодий сиёсатини танқид қилгани учун партиядан четлаштирилган, аммо Мао вафотидан кейин яна партияга қайтарилган.
1991 йилда Хитой бош вазирининг ўринбосари бўлган, 1998 йилда эса бош вазир лавозимига келган. У Хитойнинг Жаҳон савдо ташкилотига кириши бўйича музокараларда ҳам муҳим роль ўйнаган.
<iframe width="560" height="315" src="https://www.youtube.com/embed/6Z0FlBrU8LE?si=5FOPgDuXECDlFvT9" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев,ЎзА
