ФОТОГАЛЕРЕЯ: Тошкент вилояти — тараққиётнинг янги манзиллари

Мустақиллигимизнинг 35 йиллиги олдидан

«Ягона Ватан, ягона халқ бўлиб, янги ҳаёт
ва келажак яратамиз!»

Пойтахтга туташ ҳудуд. Бу оддий географик таъриф эмас, балки Тошкент вилоятининг бугунги иқтисодий ва ижтимоий қиёфасини белгилаб берадиган муҳим омиллардан бири. Пойтахт билан чамбарчас боғланган вилоятда саноат, қурилиш, транспорт, хизмат кўрсатиш ва қишлоқ хўжалиги бир-бирини тўлдириб, янги тараққиёт манзилларини шакллантирмоқда.

Сўнгги йилларда вилоят шаҳар ва туманларида кенг кўламли бунёдкорлик ишлари авж олди. Янги турар жойлар, замонавий ижтимоий объектлар, йўллар ва муҳандислик тармоқлари барпо этилиб, аҳоли учун қулай яшаш муҳитини яратишга қаратилган лойиҳалар кўлами кенгайди.

[gallery-31119]

Тошкент вилоятининг иқтисодий қиёфасида саноат алоҳида ўрин тутади. Янги корхоналар, ишлаб чиқариш мажмуалари ва саноат зоналари ҳудудларнинг ихтисослашувини бойитиб, маҳаллий имкониятларни ишга солиш учун янги майдонларни очмоқда. Ишлаб чиқаришда замонавий технологияларнинг қўлланиши маҳсулот турларини кўпайтириш, рақобатбардошликни ошириш ва экспорт салоҳиятини юксалтиришга хизмат қилмоқда.

Қишлоқ хўжалигида ҳам янгича ёндашувлар устувор. Интенсив боғлар, замонавий иссиқхоналар, сув тежовчи технологиялар ва қайта ишлаш корхоналари аграр тармоқнинг янги қиёфасини белгиламоқда. Дала ва боғлардаги меҳнат жараёни саноат ва агрологистика имкониятлари билан уйғунлашиб, маҳсулотни етиштиришдан тортиб тайёрлаш ва бозорга етказишгача бўлган занжирни мустаҳкамламоқда.

Тошкент вилоятининг яна бир муҳим жиҳати — табиат ва замонавий ҳаёт уйғунлиги. Чорвоқ, Бўстонлиқ тоғлари, сўлим даралар ва дам олиш масканлари туризм учун катта имконият яратади. Бу ҳудудларда янги сайёҳлик объектлари, меҳмонхоналар ва хизмат кўрсатиш инфратузилмаси барпо этилаётгани вилоятнинг туристик қиёфасини янада бойитмоқда.

Таълим, тиббиёт, спорт ва ижтимоий соҳадаги ўзгаришлар эса тараққиётнинг инсон ҳаётидаги аксидир. Янги мактаблар ва таълим муассасалари, замонавий тиббиёт объектлари, спорт майдонлари ва обод маҳаллалар — вилоятдаги янгиланишларнинг кундалик ҳаётдаги кўринишларидир.

Ушбу фотогалерея Тошкент вилоятининг ана шу турфа қиёфасини — замонавий корхонадаги иш жараёнидан тортиб даладаги меҳнатгача, янги бунёдкорликдан тоғ бағридаги сайёҳлик масканларигача бўлган манзараларни бир жойга жамлайди.

Тошкент вилояти бугун пойтахт атрофидаги ҳудуд эмас, балки саноат, инвестиция, тадбиркорлик, туризм ва инсон капитали учун тобора янги имкониятлар яратаётган йирик тараққиёт маконидир.

Аслиддин АЛИЖОНОВ(сурат),ЎзА