Эрон уруши: АҚШ илк бор ўқ-дори танқислигини тан олди (+видео)
АҚШ ва Исроилнинг Эронга қарши уруши бошланганидан олти ойдан кўпроқ вақт ўтиб, Қўшма Штатлар расман Америка армияси ўқ-дори танқислигига дуч келганини тан олди, дейилади DW тарқатган хабарда.
Хабарда айтилишича, Пентагоннинг АҚШ Конгрессига тақдим этган мажбурий ҳисоботида Эрондаги уруш оқибатида АҚШ Қуролли кучларида ўқ-дори етишмаслиги юзага келгани қайд этилган. Конгресснинг мустақил бюджет бошқармаси ҳисоботига кўра, ҳозирга қадар Эрондаги уруш АҚШга 38 миллиард долларга тушган. Пентагон бош инспектори ҳисоботидан маълум бўлишича, ушбу маблағнинг 22,3 миллиард доллари ўқ-дорилар учун сарфланган.
«Уруш стратегик захираларда танқислик юзага келишига, шунингдек, саноат ва ўқ-дори захираларини тўлдириш таъминоти соҳаларида етишмовчиликлар пайдо бўлишига олиб келди», — дейилади ҳисоботда.
АҚШ президенти Дональд Трамп Эрондаги уруш туфайли Америка армиясининг қурол-яроғ захиралари қисқараётгани ҳақидаги танқидларни бир неча бор рад этган. Аммо, айни пайтда АҚШ Қуролли кучларидаги қурол-яроғ танқислиги Америка қурол таъминотига қарам бўлган Украина ва Тайванда хавотир уйғотмоқда.
Шунингдек, Россияга қарши мудофаа уруши олиб бораётган Украина, хусусан, Америкада ишлаб чиқарилган ҳаво мудофаа тизими учун ракеталарга эҳтиёж сезмоқда.
Тайван учун эса Вашингтон билан қурол-яроғ хариди бўйича келишувлар Пекинни тийиб туриш нуқтаи назаридан муҳим аҳамиятга эга.
Пентагон ҳисоботига кўра, Эрондаги уруш давомида АҚШнинг етти нафар ҳарбий хизматчиси жангларда ҳалок бўлган, яна етти нафари бошқа ҳодисалар оқибатида вафот этган. Жанговор амалиётлар давомида 417 нафар америкалик ҳарбий ярадор бўлган.
Бундан ташқари, АҚШ Қуролли кучларининг қирувчи ва жанговор самолётлари ҳамда дронлари йўқ қилинган.
Шунингдек, ҳужжатда таъкидланишича, Яқин Шарқдаги АҚШ ҳарбий базаларидаги юзлаб бино ва иншоотлар ҳам зарар кўрган.
Кенжа Бекжонов, Салимжон Обиджонов, ЎзА
