Эрон АҚШ кемаларини Ҳурмузга киритмади (+видео)
Euronews нашри Эрон расмий манбаларига таяниб, Ҳурмуз бўғозида Америка фрегатига ўқ узилганини маълум қилди.
Бундан бир кун олдин Дональд Трамп нефть ташувчи танкерларга АҚШ ҳарбий-денгиз кучлари ҳамроҳлик қилишини маълум қилган эди.
АҚШ президенти стратегик аҳамиятга эга бўлган ушбу сув йўлида кемаларни кузатиш ишлари бошланишини эълон қилганидан сўнг, Эрон ҳарбийлари Америка кемаларининг Ҳурмуз бўғозига киришига йўл қўймаганини маълум қилди. Эрондаги йирик ахборот агентликларидан бири “Tasnim” тарқатган қисқа баёнотда бу ҳолат бўйича қўшимча маълумотлар кейинроқ эълон қилинади, дейилган.
Шу билан бирга, Ислом инқилоби қўриқчилари корпуси билан боғлиқ Эрон оммавий ахборот воситалари Ҳурмуз бўғозида АҚШ ҳарбий-денгиз кучлари фрегатига икки ракета отилганини маълум қилди.
“Душанба куни Жаск порти яқинида денгиз хавфсизлиги қоидаларини бузган ҳолда ҳаракатланган фрегат Эрон ҳарбий-денгиз кучларининг огоҳлантиришларини инобатга олмаганидан кейин ракета зарбасига учради”, — деб хабар берди “Fars” ахборот агентлиги.
Ўз навбатида, АҚШ ҳарбийлари Ҳурмуз бўғозида АҚШ ҳарбий-денгиз кучларининг бирор кемасига зарба берилгани ҳақидаги маълумотни рад этмоқда.
Яқин Шарқдаги АҚШ қўшинларини мувофиқлаштирувчи Марказий қўмондонлик эса “АҚШ ҳарбий-денгиз кучларининг бирорта кемасига зарар етказилмаган. Америка қўшинлари “Озодлик” операциясини қўллаб-қувватламоқда ва Эрон портлари атрофида денгиз блокадасини таъминламоқда”, — деб маълум қилди.
Бирлашган Араб Амирликлари Эрон томонидан Ҳурмуз бўғозида давлат нефть компаниясига тегишли танкерга икки дрон учирганини маълум қилди ва бу ҳужумни қоралади.
Бундан бир кун олдин Дональд Трамп ижтимоий тармоқларда АҚШ Ҳурмуз бўғозида кемаларга “ҳамроҳлик қилишини” ёзиб, Эроннинг уларни тўсишга уринишлари “афсуски, куч ишлатиш орқали тўхтатилишини” таъкидлаган эди.
Эрон ҳарбий қўмондонлиги эса ўтаётган кемалар ўз ҳаракатларини улар билан мувофиқлаштириши кераклигини билдирди.
“Биз огоҳлантирамиз: ҳар қандай хорижий қуролли кучлар, айниқса агрессив АҚШ қуролли кучлари Ҳурмуз бўғозига яқинлашса ёки унга киришга уринса, нишонга олинади”, — деди генерал-майор Али Абдуллоҳи давлат телеканалига берган интервьюсида.
<iframe width="650" height="420" src="https://www.youtube.com/embed/oE8qhGdsoqw" title="Eron AQSh kemalarini Hurmuzga kiritmadi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Искандар Исматов, ЎзА
