Енгил атлетикачимиз йигирма йиллик рекордни янгилади
Пойтахтимиздаги “Олимпия шаҳарчаси”да енгил атлетика бўйича ўтказилган Марказий Осиё чемпионати ўзбек енгил атлетикаси тарихига янги зарварақларни битгани билан аҳамиятли бўлди.
Чемпионатнинг U16 ёш тоифасида Навоий шаҳар спортнинг ўйин турлари ва енгил атлетикага ихтисослаштирилган спорт мактаби спортчиси Одилбек Ҳамдамов юқори натижа қайд этди ва йигирма йиллик рекордни янгилашга эришди.
Марказий Осиё мамлакатларининг энг маҳоратли енгил атлетикачилари қатнашган шиддатли баҳсларда Одилбек Ҳамдамов 400 метр масофага югуришда 50,87 сония натижа кўрсатиб, 16 ёшгача бўлган спортчилар ўртасида Ўзбекистон рекордини ўрнатди.
Мазкур натижа билан ёш спортчи 2006 йилдан буён сақланиб келган ва Рустам Миробидовга тегишли 50,9 сониялик рекордни янгилашга муваффақ бўлди.
Эслатиб ўтамиз, Ўзбекистон терма жамоаси 19 та олтин, 24 та кумуш ва 20 та бронза медалига эга чиққан ҳолда Марказий Осиё чемпионатида умумжамоада 1-ўринни эгаллади.
Т.Рўзиев,
ЎзА
