Бухоро кореяликларни мафтун этмоқда
Ўзбекистоннинг минг йиллик тарих ва маданият бешиги саналган Бухоро шаҳри бугун нафақат мамлакатимиз, балки бутун дунё сайёҳлари учун энг жозибадор манзиллардан бирига айланиб бормоқда.
Ўзбекистон Республикаси Туризм қўмитаси кўмагида Бухоро вилоятида Жанубий Кореядан ташриф буюрган машҳур блогерлар, контент яратувчилар ва оммавий ахборот воситалари вакиллари иштирокида махсус инфо-тур ташкил этилди. Мазкур ташриф икки мамлакат ўртасидаги туризм соҳасидаги ҳамкорликни янги босқичга олиб чиқиш, Бухоронинг ноёб имкониятларини халқаро аудиторияга етказишда муҳим аҳамият касб этади.
Инфо-тур давомида меҳмонлар Бухоронинг тарихий ва маданий дурдоналари билан яқиндан танишиш имконига эга бўлди. Улар дунё цивилизацияси ривожида муҳим ўрин тутган Арк қалъаси, муҳташам Пойи Калон мажмуаси, шарқона муҳитни ўзида мужассам этган Лаби Ҳовуз ансамбли, қадимий савдо тоқлари ҳамда шаҳарнинг юраги ҳисобланган марказий бозорга ташриф буюрди.
Айниқса, кўп асрлик тарих нафаси уфуриб турган меъморий обидалар, бетакрор наққошлик ва миллий анъаналар кореялик меҳмонларда катта таассурот қолдирди. Улар Бухоронинг ҳар бир кўчаси, ҳар бир обидаси ўзига хос тарихий ҳикояга эга эканини алоҳида таъкидлади.
Меҳмонлар маҳаллий аҳолининг самимийлиги ва меҳмондўстлигини ҳам юқори баҳоладилар. Бухороликларнинг очиқкўнгиллиги, миллий қадриятларга содиқлиги ва сайёҳларга бўлган ҳурмат-эътибори уларнинг энг ёрқин таассуротларидан бири бўлди.
Ташрифнинг яна бир муҳим жиҳати шундаки, блогерлар ва медиа вакиллари инфо-тур жараёнини ўзларининг ижтимоий тармоқлардаги саҳифалари орқали реал вақт режимида ёритиб борди. Миллионлаб обуначиларга эга мазкур инфлюенсерлар томонидан жойлаштирилган фото ва видеолавҳалар Бухоронинг гўзал қиёфасини халқаро аудиторияга намоён қилди. Бу эса шаҳарнинг туристик брендини янада мустаҳкамлаш ва янги сайёҳларни жалб этишга хизмат қилиши, шубҳасиз.
Мутахассисларнинг фикрича, бу каби инфо-турлар анъанавий реклама воситаларига нисбатан анча самарали ҳисобланади. Чунки сайёҳлар реал таассуротлар, ҳақиқий саёҳат тажрибаси ва ишончли тавсияларга кўпроқ қизиқиш билдиради. Шу маънода, кореялик блогерлар томонидан тарқатилаётган контент Бухоронинг халқаро туризм бозоридаги рақобатбардошлигини янада оширишга хизмат қилади.
Бугунги кунда Жанубий Корея Ўзбекистон учун истиқболли туристик бозорлардан бири ҳисобланади. Шу боис икки давлат ўртасидаги туризм соҳасидаги алоқаларни мустаҳкамлаш, янги туристик йўналишларни шакллантириш ва ўзаро сайёҳлар алмашинувини кўпайтириш муҳим вазифалардан саналади.
Бухоро бу фақат қадимий шаҳар эмас, балки Шарқ цивилизациясининг тирик музейи, тарих ва замонавийлик уйғунлашган бетакрор маскандир. Жанубий кореялик блогерлар ва медиа вакилларининг ташрифи эса ушбу муқаддас заминнинг жаҳон туризм харитасидаги ўрнини янада мустаҳкамлашга хизмат қилмоқда.
Зариф Комилов, ЎзА мухбири
