Baxmallik o‘quvchilarga munosib bayram tuhfasi
Mustaqillik ayyomi arafasida amalga oshirilayotgan har bir bunyodkorlik ishida xalqimizning ertangi kunga ishonchi, farzandlar kamoliga bo‘lgan yuksak e’tibor mujassam. Jizzax viloyatining Baxmal tumanida yangi o‘quv yili arafasida foydalanishga topshirilgan ikki ta’lim maskani ham ana shu ezgu maqsadning amaliy ifodasi bo‘ldi.
O‘zbekiston Respublikasi Davlat mustaqilligining 35 yilligi munosabati bilan tumandagi 90-sonli umumta’lim maktabining yangi binosi barpo etilib, o‘quvchilar ixtiyoriga topshirilgan bo‘lsa, 30-sonli umumta’lim maktabi esa rekonstruksiya qilinib, zamonaviy qiyofada yangi o‘quv yilini qarshi olishga tayyor holga keltirildi.
Ikki manzildagi bu yangilikning mazmuni bir — bolalarga sifatli ta’lim olishi uchun munosib sharoit yaratish.
90-sonli maktabning yangi binosida o‘quvchilarning puxta bilim olishi, bo‘sh vaqtini mazmunli o‘tkazishi va har tomonlama kamol topishi uchun zarur imkoniyatlar yaratildi. Yangi ta’lim maskani zamonaviy qiyofasi bilan nafaqat mahalla ko‘rkiga ko‘rk qo‘shdi, balki bu yerda ta’lim oladigan bolalarning orzu-intilishlariga ham yangi yo‘l ochdi.
30-sonli maktabdagi rekonstruksiya ishlari esa ta’lim maskanini zamon talablari asosida yangilashga qaratildi. Bu yerda sinfxonalar, fan kabinetlari, kutubxona va zarur infratuzilma yaxshilanib, o‘quvchilar uchun qulay va zamonaviy ta’lim muhiti shakllantirildi.
Ta’lim maskanlarining aynan Mustaqillik bayrami arafasida foydalanishga topshirilgani voqeaga yanada chuqur mazmun bag‘ishladi. Zero, istiqlol yillarida yurtimizda amalga oshirilayotgan keng ko‘lamli islohotlarning eng muhim maqsadlaridan biri — yosh avlodning bilimli, dunyoqarashi keng va yurt taqdiriga daxldor insonlar bo‘lib voyaga yetishi uchun barcha zarur sharoitlarni yaratishdir.
Tadbirlarda tuman hokimi Aziz Ergashev ishtirok etib, o‘qituvchi va murabbiylar, o‘quvchilar hamda mahalla ahlini yurtimizning qutlug‘ bayrami — Mustaqillikning 35 yilligi bilan samimiy muborakbod etdi.
Baxmaldagi bu ikki manzilda bugun yangi o‘quv yilining ilk qadamlari tashlanadi. Yangi sinfxonalarda bolalarning shovqin-suroni, ustozlarning saboqlari yangraydi. Eng muhimi, bu binolar endi bilim va tarbiya, orzu va maqsadlar sari yo‘l ochadi.
Zero, maktab — oddiy bino emas. U millatning ertangi kuni tarbiyalanadigan muqaddas maskan. Shu ma’noda, Baxmalda Mustaqillikning 35 yilligi arafasida foydalanishga topshirilgan ikki ta’lim maskani bayramning eng ulug‘ mazmuni — inson qadri va kelajak avlod orzulari bilan uyg‘unlashgan munosib tuhfaga aylandi.
Abdujalol Qayumov, O‘zA muxbiri
