Балиқчилик соҳаси хорижлик инвесторлар эътиборида
Ўзбекистонда қишлоқ, ўрмон ва балиқчилик хўжалиги соҳасига хорижий инвестиция ва кредитларни жалб этиш кўлами йилдан-йилга сезиларли даражада ортиб бормоқда.
Миллий статистика қўмитаси маълумотларига кўра, 2026 йилнинг январь–июнь ойларида мазкур соҳада асосий капиталга 26 триллион сўмлик хорижий инвестиция ва кредитлар ўзлаштирилган. Бу республика бўйича ўзлаштирилган жами хорижий инвестиция ва кредитларнинг 10 фоизини ташкил этган.
Рақамлар соҳадаги ўзгаришлар суръати юқори эканини кўрсатади. Хусусан, 2022 йилнинг январь–июнь ойларида қишлоқ, ўрмон ва балиқчилик хўжалигига 3 триллион сўмлик хорижий инвестиция ва кредитлар йўналтирилган бўлса, 2023 йилда бу кўрсаткич 2,4 триллион сўмни ташкил этган.
Ўтган 2024 йилга келиб инвестициялар ҳажми 6,1 триллион сўмга етди. 2025 йилда эса кескин ўсиш кузатилиб, 16,9 триллион сўмга чиқди. Жорий йилнинг дастлабки олти ойида мазкур кўрсаткич 26 триллион сўмни ташкил этди. Демак, 2026 йилда соҳада ўзлаштирилган хорижий инвестиция ва кредитлар ҳажми 2022 йилнинг мос даврига нисбатан қарийб 8,7 баробар кўпайган. Фақат бир йиллик даврда — 2025 йил январь–июнига нисбатан эса 9,1 триллион сўмга ёки 53,8 фоизга ошган.
Бу рақамлар қишлоқ хўжалиги, ўрмон ва балиқчилик тармоқларининг хорижий сармоядорлар учун тобора жозибадор бўлиб бораётганини кўрсатади. Инвестицияларнинг ортиши эса замонавий технологияларни жорий этиш, ишлаб чиқариш қувватларини кенгайтириш, ресурслардан самарали фойдаланиш ва аграр соҳада қўшилган қиймат занжирини ривожлантириш учун янги имкониятлар яратади.
Маълумот ўрнида таъкидлаш лозимки, мамлакатда мавжуд қонунчиликка асосан, келгусида балиқчилик хўжаликларида балиқ етиштириш, озуқа сарфи, сув истеъмоли ҳамда қўлланаётган технология турлари бўйича ҳисоботларни онлайн юритиш учун “e-baliq” электрон платформасини жорий этиш ҳамда “e-baliq” электрон платформаси орқали сувдан фойдаланиш тартиби лойиҳасини ишлаб чиқиш ҳам режалаштирилган.
Муҳайё Тошқораева, ЎзА
